ମାଓ ପ୍ରବଣ ଅଂଚଳ ତାଲିକାରୁ ୫ ଜିଲ୍ଲା ବାଦ: ଡିଜି

Jul 10, 2020 - 05:31 Updated: Jul 10, 2020 - 05:31

4434

ରାଜ୍ୟରେ ଆଇନ ଶୃଙ୍ଖଳା ସ୍ଥିତି ସୁଧୁରିଛି । ମାଓ ପ୍ରବଣ ଅଂଚଳ ତାଲିକାରୁ ୫ ଜିଲ୍ଲାକୁ ବାଦ ଦିଆଯାଇଛି । ପୁଲିସ ଡିଜି ଅଭୟ ଏହି ସୂଚନା ଦେଇଛନ୍ତି । ଟ୍ୱିଟ ଯୋଗେ ଡିଜିପି ଓଡ଼ିଶା ଉଲ୍ଳେଖ କରିଛନ୍ତିଯେ, ଏଣିକି ଅନୁଗୁଳ, ବୌଦ୍ଧ, ସମ୍ବଲପୁର, ଦେବଗଡ଼ ଓ ନୟାଗଡ଼ ଜିଲା ମାଓପ୍ରବଣ ଜିଲ୍ଲା ଭାବେ ବିବେଚିତ ହେବନାହିଁ । ରାଜ୍ୟ ସରକାରଙ୍କ ଅନୁମୋଦନ କ୍ରମେ ଏହି ୫ ଜିଲ୍ଲାକୁ ଏଲଡବ୍ଲୁ୍ୟଇ ପ୍ରଭାବିତ ଏସଆରଇ ଜିଲ୍ଲାରୁ ବାଦ ଦିଆଯାଇଛି । ଆମ ସୁରକ୍ଷା ବ୍ୟବସ୍ଥାରେ କେତେ ଉନ୍ନତି ଆସିଛି ଏଥିରୁ ତାହା ପ୍ରମାଣିତ ହୋଇଛି । ସାରା ଓଡ଼ିଶାକୁ ବାମପନ୍ଥୀ ଉଗ୍ରବାଦରୁ ମୁକ୍ତ କରିବା ପାଇଁ ଓଡ଼ିଶା ପୁଲିସ ପ୍ରତିଶ୍ରୁତିବଦ୍ଧ ବୋଲି ଡିଜିପି କହିଛନ୍ତି । ସୂଚନାଯୋଗ୍ୟଯେ, ଛତିଶଗଡ଼ ଭଳି ଓଡ଼ିଶା ମଧ୍ୟ ମାଓ ପ୍ରଭାବିତ । ଜଙ୍ଗଲ ଭିତରେ ଲୁଚିଛପି ନକ୍ସଲମାନେ ଉଗ୍ରବାଦୀ କାର୍ଯ୍ୟକଳାପ ଜାରି ରଖିଥା’ନ୍ତି । ବିକାଶ କାର୍ଯ୍ୟରେ ବାଧା ସୃଷ୍ଟି କରିବା ସହ ନୀରିହ ଲୋକମାନଙ୍କୁ ହତ୍ୟା କରିବାର ବି ନଜିର ରହିଛି । ତେବେ ସେହିସବୁ ଅଂଚଳରେ ବ୍ୟାପକ ସୁରକ୍ଷାର ବ୍ୟବସ୍ଥା ସହ ବିକାଶ କାର୍ଯ୍ୟ ତ୍ୱରାନ୍ୱିତ ଦିଗରେ ଉଭୟ କେନ୍ଦ୍ର ଓ ରାଜ୍ୟ ସରକାର ପଦକ୍ଷେପ ଗ୍ରହଣ କରି ଆସୁଛନ୍ତି । ଅପରପକ୍ଷରେ ରାଜ୍ୟ ସରକାରଙ୍କୁ ଆତ୍ମସମର୍ପଣ ପ୍ୟାକେଜ ଲୋଭରେ ମଧ୍ୟ ଅନେକ ନକ୍ସଲ ମୁଖ୍ୟ ସ୍ରୋତକୁ ଫେରି ଆସିଛନ୍ତି । ଧିରେଧିରେ ସେମାନଙ୍କ କ୍ୟାଡ଼ର ମଧ୍ୟ ହ୍ରାସ ପାଇଚାଲିଛି ।