ଭାରତୀୟ ସେନାର ଫାୟାରି ରେଞ୍ଜରେ ଚୀନ ସେନା

Sep 3, 2020 - 07:50 Updated: Sep 3, 2020 - 07:50

2472

ନୂଆଦିଲ୍ଲୀ: ଅଗଷ୍ଟ ୨୯ ମଧ୍ୟରାତ୍ରରେ ଭାରତୀୟ ସେନା ଏଲଏସିର ଚୁଷୁଲ ସେକ୍ଟରରେ କିଛି ପାହାଡ଼ ଶିଖର ଉପରେ କବଜା କରିଥିଲେ । ପୈଙ୍ଗୋଙ୍ଗ ହ୍ରଦର ଦକ୍ଷିଣ ଭାଗରୁ ଆରମ୍ଭ ହୋଇ ରେଜାନ ଏବଂ ରେକିନ ଦେଇ ସାଙ୍ଗୁର ଯାଏଁ ଲମ୍ବିଥିବା ପର୍ବତମାଳାରେ ଏହି ଶିଖରଗୁଡ଼ିକ ଅବସ୍ଥିତ । ଭାରତକୁ ଏହାଯୋଗୁଁ ଅନେକ ପ୍ରକାରର ସାମରିକ ଫାଇଦା ମିଳିପାରିବ । ଚୀନ ସେନା ମୁତୟନ ହୋଇଥିବା ସ୍ଥାନଗୁଡ଼ିକ ନୀଚାରେ ଥିବାରୁ ପାହାଡ଼ ଉପରୁ ସେମାନଙ୍କ ଗତିବିଧି ଉପରେ ନିୟମିତ ନଜର ରଖାଯାଇପାରିବ । ବିଶେଷ କରି ମୋଲଡୋ ସ୍ଥିତ ଚୀନ ସେନାର କ୍ୟାମ୍ପ ଉପରେ ତୀକ୍ଷ୍ମ ନଜର ରଖାଯାଇପାରିବ । ଫଳରେ ଚୀନ ସେନା ଅକଳରେ ପଡ଼ିବ । ଯୁଦ୍ଧ ହେଲେ ଚୀନ ସେନାକୁ ବ୍ୟାପକ କ୍ଷତି ସହିବାକୁ ପଡ଼ିବ । କାରଣ ଚୀନ ସେନା ମୁତୟନ ହୋଇଥିବା ସ୍ଥାନ ଗୁଡ଼ିକ ପାହାଡ଼ ଶିଖର ଉପରେ ମୁତୟନ ହୋଇଥିବା ଭାରତୀୟ ସେନାର ଫାୟାରିଂ ରେଞ୍ଜରେ ଆସୁଛି । ଚୀନ ମଧ୍ୟ ଏହାର ଗୁରୁତ୍ୱ ବୁଝିପାରୁଛି । ଭାରତୀୟ ସେନା ଏହି ପାହାଡ଼ ଶିଖରଗୁଡ଼ିକ ଉପରେ ଅତିରିକ୍ତ ସୈନିକ ସାଙ୍ଗକୁ ବ୍ୟାପକ ମାତ୍ରାରେ ଯୁଦ୍ଧାସ୍ତ୍ର ମୁତୟନ କରିସାରିଛି ।