ଏନ ଭାସ୍କର ରାଓ ବିଜେଡି ରାଜ୍ୟ ଉପସଭାପତି
admin
ରାୟଗଡା : ବରିଷ୍ଠ ବିଜେଡି ନେତା ତଥା ପୁର୍ବତନ ରାଜ୍ୟସଭା ସାଂସଦ ଏନ. ଭାସ୍କର ରାଓଙ୍କୁ ଦଳରେ ବଡ଼ ଦାୟିତ୍ବ ମିଳିଛି। ତାଙ୍କୁ ଦଳର ରାଜ୍ୟ ଉପସଭାପତି ଭାବେ ମନୋନୀତ କରାଯାଇଛି। ଦକ୍ଷିଣ ଓଡ଼ିଶାରେ ବିଜୁ ବାବୁଙ୍କ ଅତ୍ୟନ୍ତ ଘନିଷ୍ଠ ଅନୁଗତ ଭାବେ ପରିଚିତ ଏହି ଟାଣୁଆ ନେତାଙ୍କୁ ଏହି ଦାୟିତ୍ବ ମିଳିବା ପରେ ଦଳୀୟ କର୍ମିଙ୍କ ମହଲରେ ଉତ୍ସାହ ଦେଖାଦେଇଛି। କଂଗ୍ରେସର ଗଡ ଭାବେ ପରିଚିତ ରାୟଗଡା ଜିଲ୍ଲାରେ ଦୀର୍ଘ ୫୦ ବର୍ଷ ଧରି ସେ ଅଣକଂଗ୍ରେସ ରାଜନୀତି ସହ ଜଡିତ ରହି ଏଠାରେ ଦଳୀୟ ସଙ୍ଗଠନକୁ ମଜଭୁତ କରିବାରେ ବଡ ଭୂମିକା ନିଭାଇଛନ୍ତି। ଏହା ପୁର୍ବରୁ ସେ ଜିଲ୍ଲା ସଭାପତି, ରାଜ୍ୟ ସାଧାରଣ ସମ୍ପାଦକ, ରାଜ୍ୟ ଉପସଭାପତି ଭଳି ଗୁରୁ ଦାୟିତ୍ୱ ବିଜେଡ଼ିରେ ସମ୍ଭାଳିଛନ୍ତି।
ଏକାଧିକବାର ସେ ବିଭିନ୍ନ ନିଗମର ଅଧ୍ୟକ୍ଷ, ରାଜ୍ୟ ଯୋଜନାବୋର୍ଡ ଉପାଧ୍ୟକ୍ଷ ପରେ ସେ ରାଜ୍ୟସଭା ସାଂସଦ ଭାବେ ୬ ବର୍ଷ କାର୍ୟ୍ୟକାଳ ସଫଳତାର ସହ ତୁଲାଇଛନ୍ତି। ତେବେ କିଛିଦିନ ହେଲା ଦଳରେ ତାଙ୍କ ବିରୋଧୀ ଗୋଷ୍ଠୀ ସକ୍ରିୟ ହେବାପରେ ସେ ନିରବ ରହିଥିଲେ। କିନ୍ତୁ ନିକଟରେ ଝାରସୁଗୁଡ଼ା ଉପ ନିର୍ବାଚନରେ ସକ୍ରିୟ ଭୂମିକା ନିଭାଇଥିଲେ। ଏହା ସହିତ ରାଜଧାନୀରେ ଶଙ୍ଖ ଭବନ ଉଦଘାଟନ ବେଳେ ଭାସ୍କରଙ୍କୁ ନବୀନ ଖୋଜିବା ଘଟଣା ପରେ ସେ କିଛି ଗୋଟିଏ ବଡ ଦାୟିତ୍ବ ପାଇ ପାରନ୍ତି ବୋଲି ଆଲୋଚନା ହେଉଥିଲା। ତାହା ସତ ହୋଇଛି। ତାଙ୍କୁ ବିଜେଡି ରାଜ୍ୟ ଉପସଭାପତି ଘୋଷଣା ପରେ ଶୁଭେଚ୍ଛା ସୁଅ ଛୁଟିଥିଲା।
