ସୁବର୍ଣ୍ଣପୁରରେ 200 ଶଯ୍ୟା ବିଶିଷ୍ଟ କୋଭିଡ୍-19 ହସ୍ପିଟାଲ କାର୍ଯ୍ୟକ୍ଷମ ହେଲା
ସୁବର୍ଣ୍ଣପୁରରେ 200 ଶଯ୍ୟା ବିଶିଷ୍ଟ କୋଭିଡ୍-19 ହସ୍ପିଟାଲ କାର୍ଯ୍ୟକ୍ଷମ ହେଲା
admin
5057
ସ୍ଥାନୀୟ ଗୀତଗୋବିନ୍ଦ ସଦନରେ ରାଜ୍ୟ ସରକାରଙ୍କ ମୁଖ୍ୟ ମୁଖପାତ୍ର ସୁବ୍ରତ ବାଗ୍ଚୀ ରାଜ୍ୟ ବାସୀଙ୍କୁ କରୋନାର ଅପ୍ଡେଟ୍ ସମ୍ପର୍କରେ ବିଗତ ମାସେ ହେବ ସୂଚନା ଦେଇ ଆସୁଛନ୍ତି । ଏହା ସହିତ ରାଜ୍ୟରେ ବିଭିନ୍ନ କୋଭିଡ୍ 19 ହସ୍ପିଟାଲ ସମ୍ପର୍କରେ ସୂଚନା ଦେଇଛନ୍ତି । ଆଜି ସୁବର୍ଣ୍ଣପୁରରେ ଏକ 200 ଶଯ୍ୟା ବିଶିଷ୍ଟ ହସ୍ପିଟାଲ କାର୍ଯ୍ୟକ୍ଷମ ହୋଇଛି । ଏହି ହସ୍ପିଟାଲକୁ ମିଶାଇ ରାଜ୍ୟର 19ଟି ଜିଲ୍ଲାରେ 21ଟି କୋଭିଡ୍ 19 ହସ୍ପିଟାଲ କାର୍ଯ୍ୟକ୍ଷମ ହୋଇଛି । ଏହା ସହିତ ସମୁଦାୟ ଶଯ୍ୟା ସଂଖ୍ୟା 3620 ରହିଛି । ରାଜ୍ୟରେ ପଡୋଶୀ ରାଜ୍ୟର 77 ହଜାର ଶ୍ରମଜୀବୀ ରହିଥିବା ବେଳେ 2553ଟି ଶିବିର ଜରିଆରେ ସେମାନଙ୍କର ରହିବା ଏବଂ ଖାଇବା ବନ୍ଦୋବସ୍ତ କରାଯାଇଛି । ରାଜ୍ୟର 5387 ଗ୍ରାମପଞ୍ଚାୟତରେ 3 ଲକ୍ଷ 9 ହଜାର 42 ଜଣଙ୍କୁ ଏବଂ 113 ପୌରାଞ୍ଚଳରେ 33816 ଜଣଙ୍କୁ ରନ୍ଧାଖାଦ୍ୟ ପ୍ରଦାନ କରାଯାଇଛି । ଏହା ସହିତ ରାଜ୍ୟର ବିଭିନ୍ନ ଗଣମାଧ୍ୟମ ଅଧିକାରୀଙ୍କ ପକ୍ଷରୁ ପଚରା ଯାଇଥିବା ପ୍ରଶ୍ନର ଉତ୍ତର ରଖିଥିଲେ ବାଗ୍ଚୀ । କୋଭିଡ୍-19କୁ ନେଇ ରହିଥିବା ଗୁଜବକୁ ବିଶ୍ବାସ ନକରିବା ପାଇଁ ବାଗ୍ଚୀ ଜନ ସାଧାରଣଙ୍କୁ ନିବେଦନ କରିଥିଲେ ।
ରାଜ୍ୟ ଏନ୍ଏଚ୍ଏମ୍ ନିର୍ଦ୍ଦେଶିକା ଶାଳିନୀ ପଣ୍ଡିତ ମଧ୍ୟ ବାଗ୍ଚୀଙ୍କ ସହିତ କରୋନା ସମ୍ପର୍କରେ ଅପ୍ଡେଟ୍ ପ୍ରଦାନ କରିଥିଲେ । ଭାରତରେ କରୋନା ପଜିଟିଭ୍ ହାର 5 ପ୍ରତିଶତ ରହିଥିବା ବେଳେ ଓଡିଶାରେ ଏହି ହାର ମାତ୍ର 1.08 ପ୍ରତିଶତ ରହିଛି । ଏହି ହାର ଦିଲ୍ଲୀରେ ସର୍ବାଧିକ 11 ପ୍ରତିଶତ ରହିଛି । ଲୋକଙ୍କ ତ୍ୟାଗ ଏବଂ ଅନୁଶାସନ କାରଣରୁ ରାଜ୍ୟରେ କରୋନା ସଙ୍କ୍ରମଣ ଉପରେ ରୋକ୍ ଲଗାଯାଇପାରିଛି ବୋଲି ଶ୍ରୀମତି ପଣ୍ଡିତ ପ୍ରକାଶ କରିଥିଲେ । ରାଜ୍ୟରେ କୌଣସି ଲକ୍ଷଣ ନଥିବା 3 ଶହ ଲୋକଙ୍କ ପରୀକ୍ଷା କରାଯାଇଥିବା ବେଳେ ତନ୍ମଧ୍ୟରୁ 4 ଜଣ ପଜିଟିଭ୍ ବାହାରିଥିବା ଜଣାପଡିଛି ।
