ବିଶ୍ୱବିଦ୍ୟାଳୟ ନାମଲେଖାରେ ଆସିବ ସଂସ୍କାର, ୨୦୨୦ରୁ ଏକକ ପ୍ରବେଶିକା ପରୀକ୍ଷା
ବିଶ୍ୱବିଦ୍ୟାଳୟ ନାମଲେଖାରେ ଆସିବ ସଂସ୍କାର, ୨୦୨୦ରୁ ଏକକ ପ୍ରବେଶିକା ପରୀକ୍ଷା
admin
5387
ଭୁବନେଶ୍ୱର: ଦେଢ଼ ବର୍ଷର ମାନସମନ୍ଥନ ପରେ ଉଚ୍ଚଶିକ୍ଷା ବିଭାଗ ପକ୍ଷରୁ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆଯାଇଛି । ୨୦୨୦-୨୧ ଶିକ୍ଷାବର୍ଷଠାରୁ ଉଚ୍ଚଶିକ୍ଷା ବିଭାଗ ଅଧୀନରେ ଥିବା ସମସ୍ତ ସରକାରୀ ବିଶ୍ୱବିଦ୍ୟାଳୟରେ ନାମଲେଖା ପାଇଁ ଏକକ ପ୍ରବେଶିକା ପରୀକ୍ଷା କରାଯିବ । ଗୋଟିଏ ସମୟରେ ପରୀକ୍ଷା ହେବ । ଗୋଟିଏ ସମୟରେ ମେଧାବୀ ତାଲିକା ପ୍ରକାଶ ପାଇବ । ଏକ ସମୟରେ ସମସ୍ତ ବିଶ୍ୱବିଦ୍ୟାଳୟରେ ନାମଲେଖା ସହ ପାଠପଢ଼ା ମଧ୍ୟ ଆରମ୍ଭ ହେବ । କୌଣସି ବି ପରିସ୍ଥିତିରେ ଧାର୍ଯ୍ୟ ସମୟରେ ବିଳମ୍ବ କରାଯିବ ନାହିଁ । ଏହାଦ୍ୱାରା ନାମଲେଖା ଲାଗି ହେଉଥିବା ପ୍ରବେଶିକା ପରୀକ୍ଷାରେ ସ୍ୱଚ୍ଛତା ଆସିବା ସହ ଛାତ୍ରଛାତ୍ରୀ ଖର୍ଚ୍ଚାନ୍ତରୁ ମୁକ୍ତି ପାଇପାରିବେ ବୋଲି ଉଚ୍ଚଶିକ୍ଷା ମନ୍ତ୍ରୀ ଅରୁଣ କୁମାର ସାହୁ କହିଛନ୍ତି ।
ନିଷ୍ପତ୍ତି ଅନୁଯାୟୀ ଜୁନ୍ ୧୫ ତାରିଖ ସୁଦ୍ଧା ସମସ୍ତ ବିଶ୍ୱବିଦ୍ୟାଳୟ କର୍ତୃପକ୍ଷ ଯୁକ୍ତ ୩ ଶେଷ ବର୍ଷ ତଥା ଷଷ୍ଠ ସେମିଷ୍ଟାର ଛାତ୍ରଛାତ୍ରୀଙ୍କ ଉଭୟ ରେଗୁଲାର ଓ ବ୍ୟାକ୍ ପେପର ପରୀକ୍ଷା ଫଳ ପ୍ରକାଶ କରିବେ । ଶେଷ ବର୍ଷ ସମେତ ପ୍ରଥମ ଓ ଦ୍ୱିତୀୟ ବର୍ଷରେ ଅନୁଷ୍ଠିତ ସେମିଷ୍ଟାର ପରୀକ୍ଷାଗୁଡ଼ିକର ଫଳ ମଧ୍ୟ ଏହି ସମୟ ସୀମା ମଧ୍ୟରେ ବାହାର କରିବେ । ସେହି ଅନୁଯାୟୀ ମେ' ୧୫ ତାରିଖ ମଧ୍ୟରେ ସମସ୍ତ ସେମିଷ୍ଟାର ପରୀକ୍ଷା ସାରିବାକୁ ବିଶ୍ୱବିଦ୍ୟାଳୟ କୁଳପତି ଓ ପରୀକ୍ଷା ନିୟନ୍ତ୍ରକମାନଙ୍କୁ କୁହାଯାଇଛି । ପିଜି ନାମଲେଖା ଲାଗି ଜୁଲାଇ ୧୫ ସୁଦ୍ଧା ପ୍ରବେଶିକା ପରୀକ୍ଷା ଶେଷ ହେବ । ରାଜ୍ୟର ସମସ୍ତ ବିଶ୍ୱବିଦ୍ୟାଳୟ ସମେତ ଅନ୍ୟ କେତେକ ସହରରେ ପରୀକ୍ଷା କେନ୍ଦ୍ର କରାଯିବ । ପ୍ରବେଶିକା ପରୀକ୍ଷାର ୭୦ ପ୍ରତିଶତ ମାର୍କ ଓ କ୍ୟାରିଅରର ୩୦ ପ୍ରତିଶତ ମାର୍କକୁ ହିସାବକୁ ନିଆଯାଇ ରାଜ୍ୟସ୍ତରରେ ମେଧାବୀ ତାଲିକା ପ୍ରକାଶ ପାଇବ । ସେହି ଅନୁଯାୟୀ ଛାତ୍ରଛାତ୍ରୀ ବିଭିନ୍ନ ବିଶ୍ୱବିଦ୍ୟାଳୟରେ ନାମ ଲେଖାଇବେ ।
