ପ୍ରିୟଙ୍କାଙ୍କୁ ୟୁପି ମୁଖ୍ୟମନ୍ତ୍ରୀ ପ୍ରାର୍ଥୀ ଘୋଷଣା କରାଯିବ!
ପ୍ରିୟଙ୍କାଙ୍କୁ ୟୁପି ମୁଖ୍ୟମନ୍ତ୍ରୀ ପ୍ରାର୍ଥୀ ଘୋଷଣା କରାଯିବ!
admin
3197
ଲକ୍ଷ୍ନୌ: କଂଗ୍ରେସ ସାଧାରଣ ସମ୍ପାଦିକା ପ୍ରିୟଙ୍କା ଗାନ୍ଧି ଭଦ୍ରା ଏବେ ଉତ୍ତରପ୍ରଦେଶ ପ୍ରଭାରୀ ଦାୟିତ୍ୱ ତୁଲାଉଥିବା ବେଳେ ତାଙ୍କୁ ଦଳର ମୁଖ୍ୟମନ୍ତ୍ରୀ ପ୍ରାର୍ଥୀ କରାଯିବାକୁ ରାଜ୍ୟ ନେତାମାନେ ଜୋରଦାର ଦାବି ଉଠାଇଛନ୍ତି । ୟୁପିର ଆଗଧାଡ଼ିର କଂଗ୍ରେସ ନେତାମାନେ ଦଳ ହାଇକମାଣ୍ଡଙ୍କ ପାଖରେ ସେମାନଙ୍କ ଦାବି ଉପସ୍ଥାପନ କରିଛନ୍ତି ଏବଂ ଏ ସଂକ୍ରାନ୍ତରେ ଦଳର ଅନୁମୋଦନକୁ ଅପେକ୍ଷା କରାଯାଇଛି । ରାଜ୍ୟରେ କଂଗ୍ରେସ ସଂଗଠନକୁ ଅଧିକ ଶକ୍ତିଶାଳୀ କରିବା ଏବଂ ଦଳକୁ କ୍ଷମତାକୁ ଆଣିବାକୁ ହେଲେ ପି୍ରୟଙ୍କାଙ୍କୁ ମୁଖ୍ୟମନ୍ତ୍ରୀ ପ୍ରାର୍ଥୀ ଘୋଷଣା କରିବାକୁ ହେବ ବୋଲି ରାଜ୍ୟ ନେତାମାନେ ଯୁକ୍ତି ବାଢ଼ିଛନ୍ତି । ୨୦୧୯ ଲୋକସଭା ନିର୍ବାଚନରେ ପ୍ରିୟଙ୍କା ପୂର୍ବାଞ୍ଚଳ ଦାୟିତ୍ୱରେ ଥିଲେ ଏବଂ ଦଳର ପରାଜୟ ସତ୍ତ୍ୱେ ସେଠାରେ କଂଗ୍ରେସ କର୍ମୀମାନେ ଅଧିକ ସଂଗଠିତ ହୋଇଥିବା ଦେଖାଯାଇଥିଲା । ପ୍ରିୟଙ୍କାଙ୍କ ତତ୍ତ୍ୱାବଧାନରେ ରାଜ୍ୟର ନୂଆ କଂଗ୍ରେସ କମିଟି, ଯୁବ କମିଟି, ମହିଳା କଂଗ୍ରେସ କମିଟି ଏବଂ ଅନ୍ୟ ସାଂଗଠନିକ କମିଟି ଗଠନ ହୋଇଥିଲା । ଏବେ ହାଥରସ ଗଣଦୁଷ୍କର୍ମ ମାମଲାରେ ଉଭୟ ପ୍ରିୟଙ୍କା ଏବଂ ରାହୁଲ ଗାନ୍ଧି ସରକାରଙ୍କ ବିରୋଧରେ ଯେଭଳି ଆକ୍ରମଣାତ୍ମକ ଭୂମିକାରେ ଅବତୀର୍ଣ୍ଣ ହୋଇଛନ୍ତି ତାହା ୟୁପି ରାଜନୀତି ପାଇଁ ସେମାନଙ୍କର ନୂଆ ରଣନୀତି ବୋଲି ମଧ୍ୟ କୁହାଯାଉଛି ।
