ପ୍ରଦୀପଙ୍କ ଅକଲ ଗୁଡ଼ୁମ, ଏଭଳି ହେବ କେବେ ଭାବିନଥିଲେ
ପ୍ରଦୀପଙ୍କ ଅକଲ ଗୁଡ଼ୁମ, ଏଭଳି ହେବ କେବେ ଭାବିନଥିଲେ
admin
2509
ଭୁବନେଶ୍ୱର: ଅୟସ ଆରାମରେ ଜୀବନ ବିତାଉଥିଲେ । ଆକାଉଣ୍ଟକୁ ଆସୁଥିଲା କୋଟି କୋଟି ଟଙ୍କା । ଭାବୀ ଜ୍ୱାଇଁ ଆକାଶ ପାଠକ ସହ ଚାର୍ଟର ବିମାନରେ ଆକାଶରେ ଘୁରିବୁଲୁଥିଲେ । ତାଜ ପ୍ୟାଲେସ ହୋଟେଲରେ ଗୋଟିଏ ଦିନରେ ଲକ୍ଷାଧିକ ଟଙ୍କା ଖର୍ଚ୍ଚ କରି ଦେଉଥିଲେ । ଖାଲି ଅୟସ ଆରାମରେ ଜୀବନ ନଥିଲା ବେଶ ପ୍ରଭାବଶାଳୀ ମଧ୍ୟ ଥିଲେ ଗୋପାଳପୁର ବିଧାୟକ ପ୍ରଦୀପ ପାଣିଗ୍ରାହୀ । କିନ୍ତୁ ସେ ଯେ ଦିନେ ଜେଲରେ ଚାରିକାନ୍ଥ ଦେଖିବେ, ତାହା ସ୍ୱପ୍ନରେ କେବେ ଭାବିନଥିଲେ । ଗିରଫ ହୋଇ ଜେଲ ଯିବା ପରେ ତାଙ୍କର ଅକଲ ଗୁଡ଼ୁମ ହୋଇଯାଇଥିଲା । ଯେତିକି ସମ୍ମାନ ମିଳୁଥିଲା, ଜେଲ ଯିବା ପରେ ଢେ଼ର ଅଧିକ ନିନ୍ଦା ମଧ୍ୟ ମିଳିଛି । କେମିତି ଜେଲରେ ଦିନ କାଟିବେ, ତାକୁ ନେଇ ଝାଳ ବୋହି ଯାଇଥିଲା ପ୍ରଦୀପଙ୍କର । ଜାମିନ ନାମଞ୍ଜୁର ହେବାରୁ ରାତି ପ୍ରାୟ ସାଢେ଼ ୧୧ଟାରେ ପହଞ୍ଚିଥିବା ପ୍ରଦୀପଙ୍କୁ ମିଳିଥିଲା ୧୪ ନମ୍ବର ୱାର୍ଡ । ଜେଲ ପକ୍ଷରୁ ଦୁଇଟି କମ୍ବଳ, ଦୁଇଟି ଥାଳି, ଦୁଇଟି ଗିନା ଯୋଗାଇ ଦିଆଯାଇଥିଲା । ରାତିରେ ଖାଦ୍ୟ ଖାଇ ଜେଲକୁ ଯାଇଥିଲେ । କିନ୍ତୁ ଭଲ ଭାବେ ନିଦ ହୋଇନଥିଲା । ଦୀର୍ଘ ସମୟ ଧରି କଡ଼ ଲେଉଟାଉଥିଲେ । ମଝିରେ ମଝିରେ ଉଠି ବସି ପଡୁଥିଲେ । ଥଣ୍ଡା ପଡ଼ିବାରୁ କମ୍ବଳ ଘୋଡ଼ି ହେଉଥିଲେ । ଭୋର ସମୟରେ ନିଦ ଲାଗି ଯାଇଥିଲା । କିନ୍ତୁ ଜେଲ ନିୟମ ଅନୁସାରେ ସକାଳ ୬ ଟା ସୁଦ୍ଧା ଉଠିବାକୁ ପଡ଼ିଥିଲା । ନିତ୍ୟକର୍ମ ସାରିବା ପରେ ସବୁ କଏଦୀଙ୍କ ଭଳି ସେ ମଧ୍ୟ ଚା ପିଇଥିଲେ । ସକାଳ ଜଳଖିଆରେ ଉପମା, ଘୁଗୁନି ଖାଇଥିଲେ । ମଧ୍ୟାହ୍ନ ୧୨ଟା ସୁଦ୍ଧା ମିଳିଯାଇଥିଲା ମଧ୍ୟାହ୍ନ ଭୋଜନ । ଏଥିରେ ଭାତ, ରୁଟି, ଡାଲି ଓ ତରକାରୀ ଦିଆଯାଇଥିଲା । ଅନ୍ୟ କଏଦୀଙ୍କ ଭଳି ଧାଡ଼ିରେ ଛିଡ଼ା ହୋଇ ଥାଳିରେ ଖାଦ୍ୟ ନେଇଥିଲେ ପ୍ରଦୀପ । ସବୁବେଳେ ଘର ଖାଦ୍ୟ ଓ କେତେକ ସମୟରେ ପଞ୍ଚତାରକା ହୋଟେଲରେ ଖାଦ୍ୟ ଖାଉଥିବା ପ୍ରଦୀପଙ୍କୁ ଜେଲ ଖାଦ୍ୟରେ ସନ୍ତୁଷ୍ଟ ହେବାକୁ ପଡ଼ିଥିଲା ।
