ପୃଥିବୀ ପୃଷ୍ଠ ନୁହେଁ ଜହ୍ନ ରାଇଜରେ ଜାଗା କିଣିଛନ୍ତି କେନ୍ଦ୍ରାପଡ଼ାର ଜଣେ ଯୁବକ

Mar 22, 2021 - 12:28 Updated: Mar 22, 2021 - 12:28

5038

କେନ୍ଦ୍ରାପଡ଼ା: ପୃଥିବୀ ପୃଷ୍ଠ ନୁହେଁ ଜହ୍ନ ରାଇଜରେ ଜାଗା କିଣିଛନ୍ତି କେନ୍ଦ୍ରାପଡ଼ାର ଜଣେ ଯୁବକ । ନିଜ ଝିଅକୁ ଜନ୍ମଦିନର ଉପହାର ଦେବା ପାଇଁ ଜହ୍ନରେ ଜାଗା କିଣିଛନ୍ତି କେନ୍ଦ୍ରାପଡ଼ା ଜିଲ୍ଲା ପଟ୍ଟାମୁଣ୍ଡା ବ୍ଲକ କୁପୁଣି ଗାଁର ଅଭୟ କୁମାର ସେନାପତି । ବେଙ୍ଗାଲୁରୁରେ ରହୁଥିବା ଅଭୟ ଚନ୍ଦ୍ରରେ ଏକ ଏକର ଜମି କିଣିଥିବା ଦାବି କରିଛନ୍ତି । ନୁ୍ୟୟର୍କସ୍ଥିତ ଲୁନାର ସୋସାଇଟି ଇଣ୍ଟରନାସନାଲ ତାଙ୍କୁ ଏହି ଜମି ଯୋଗାଇ ଦେଇଛି । ମାର୍ଚ୍ଚ ମାସ ୬ ତାରିଖରେ ଅଭୟଙ୍କୁ ଜମିର ସମସ୍ତ କାଗଜପତ୍ର ମିଳିସାରିଛି । ତେବେ ଅଭୟଙ୍କର ଏହି ଜମି ଲୁନାର ରିପବ୍ଲିକଠାରୁ ମିଳିଥିବା କାଗଜପତ୍ରରେ ଦର୍ଶାଯାଇଛି । ଅଭୟ ୨୦୦୫ ମସିହାରୁ ବେଙ୍ଗାଲୁରୁରେ ରହି ଏକ କମ୍ପାନୀରେ କାମ କରୁଛନ୍ତି । ଗତ ଜାନୁଆରୀ ୧୫ ତାରିଖରେ ଅଭୟଙ୍କର ଏକ ଝିଅ ଜନ୍ମ ହୋଇଥିଲା । ଝିଅକୁ ଏକ ଉପହାର ଦେବା ପାଇଁ ସେ ଚିନ୍ତା କରିଥିଲେ । ସେ ଯେଉଁ କମ୍ପାନୀରେ କାମ କରୁଥିଲେ ସେହି କମ୍ପାନୀର ଜଣେ ସହଯୋଗୀ ଅଭୟଙ୍କୁ ଜହ୍ନରେ ଜମି କିଣିବାକୁ ପ୍ରସ୍ତାବ ଦେଇଥିଲେ । କେବଳ ସେତିକି ନୁହେଁ ଜମି ଯୋଗାଇ ଦେଉଥିବା ନୁ୍ୟୟର୍କସ୍ଥିତ କମ୍ପାନୀ ସହିତ ଯୋଗାଯୋଗ ମଧ୍ୟ କରାଇ ଦେଇଥିଲେ । ମାର୍ଚ୍ଚ ୬ରେ ଜହ୍ନରେ ନିଜ ନାମରେ ଜମି ରେଜେଷ୍ଟି୍ର ହୋଇଥିବା ସମସ୍ତ କାଗଜପତ୍ର ଅଭୟଙ୍କ ପାଖରେ ମହଜୁଦ ଅଛି । ଜହ୍ନରେ ଏକ ଏକର ଜମି ପାଇଁ ଅଭୟ ୧୦ ହଜାର ଟଙ୍କା ଦେଇଛନ୍ତି । ସମସ୍ତ କାଗଜପତ୍ର ସହିତ କମ୍ପାନୀ ଅଭୟଙ୍କୁ ତାଙ୍କ ଜମିର ଡିଜିଟାଲ ଫଟୋକପି ଯୋଗାଇ ଦେଇଥିବା ଜଣାପଡ଼ିଛି ।