ପାରିବାରିକ କଳହରୁ କରୁଣ ପରିଣତି, ପୁଅ ମାଡ଼ରେ ଗଲା ବାପାର ପ୍ରାଣ
ପାରିବାରିକ କଳହରୁ କରୁଣ ପରିଣତି, ପୁଅ ମାଡ଼ରେ ଗଲା ବାପାର ପ୍ରାଣ
admin
6524
ପୁରୀ: ପାରିବାରିକ କଳହ ନେଲା ଜୀବନ । ପୁଅ ମାଡ଼ରେ ବାପାଙ୍କ ପ୍ରାଣ ଯାଇଥିବା ନେଇ ଅଭିଯୋଗ ହୋଇଥିବା ବେଳେ ଆକ୍ରମଣକାରୀ ପୁଅ ଏବେ ଥାନାରେ । ଶୁକ୍ରବାର ବିଳମ୍ବିତ ରାତିରେ ପୁରୀରେ ଘଟିଛି ଏଭଳି ଏକ ଅଭାବନୀୟ କାଣ୍ଡ । ମୃତ ବ୍ୟକ୍ତି ଜଣକ ହେଲେ କୁମ୍ଭାରପଡ଼ା ଥାନା ଅଧୀନ ରାମଚଣ୍ଡୀ ବାଲିକୁଦା ବସ୍ତିର ଟୁକୁନା ହରିଚନ୍ଦନ
ସୂଚନାରୁ ଜଣାପଡ଼ିଛି ଯେ, ଟୁକୁନା ଓ ତାଙ୍କ ପୁଅ ମଧ୍ୟରେ ପାରିବାରିକ ବିବାଦ ଥିଲା । ଏହି ବିବାଦକୁ କେନ୍ଦ୍ର କରି ରାତିରେ ଝଗଡ଼ା ଲାଗିଥିଲେ । ବାପପୁଅ ପିଟାପିଟି ହୋଇଥିଲେ । ପୁଅ ମାଡ଼ରେ ଟୁକୁନା ଶେଷରେ ତଳେ ପଡ଼ିଯାଇଥିଲେ । ଆଉ ଉଠିପାରିନଥିଲେ । ତାଙ୍କୁ ସଙ୍କଟାପନ୍ନ ଅବସ୍ଥାରେ ସଦର ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା । ସାନ ପୁଅ ତାଙ୍କୁ ଡାକ୍ତରଖାନାରେ ଭର୍ତ୍ତି କରିଥିବା ବେଳେ ସର୍ଜରୀ ୱାର୍ଡରେ ତାଙ୍କର ଚିକିତ୍ସା ଚାଲିଥିଲା । ସେହି ସମୟରେ ଆକ୍ରମଣ କରିଥିବା ପୁଅ ସିଧା ଥାନାକୁ ଯାଇ ବାପାଙ୍କ ବିରୁଦ୍ଧରେ ଏତଲା ଦେଇଥିଲା । ହେଲେ ପୁଲିସ ତାକୁ ଅଟକ ରଖିଦେଇଥିଲା । ସେପଟେ ବେଡରେ ଛଟପଟ ହୋଇଥିଲେ ଟୁକୁନା । ଖବର ପାଇ କୁମ୍ଭାରପଡ଼ା ଥାନା ପୁଲିସ ଡାକ୍ତରଖାନା ଯାଇ ଟୁକୁନାଙ୍କ ପରିବାର ଲୋକଙ୍କୁ ପଚରା ଉଚରା କରି ଫେରିଥିଲା । ବାସ ଏହା ପରେ ଟୁକୁନାଙ୍କ ପ୍ରାଣବାୟୁ ଉଡ଼ି ଯାଇଥିଲା । ଏ ନେଇ ଡାକ୍ତର କହିଛନ୍ତି ଯେ ଆଭ୍ୟନ୍ତରୀଣ ଆଘାତ ଯୋଗୁଁ ମୃତ୍ୟୁ ଘଟିଥାଇପାରେ । ବ୍ୟବଚ୍ଛେଦ ରିପୋର୍ଟରୁ ଏହା ଜଣାପଡ଼ିବ । କୁମ୍ଭାରପଡ଼ା ଥାନା ଆଇଆଇସି କୁଳମଣି ସେଠି କହିଛନ୍ତି ଯେ, ଟୁକୁନା ସଂକଟାପନ୍ନ ଅବସ୍ଥାରେ ଡାକ୍ତରଖାନାରେ ପ୍ରାଣ ହରାଇଛନ୍ତି । ସକାଳେ ବ୍ୟବଚ୍ଛେଦ ହେବା ସହ ଛାନଭିନ ହେବ ।
