ଗର୍ଭପାତ ସମୟ ସୀମା ୨୪ ସପ୍ତାହକୁ ବୃଦ୍ଧି

Mar 17, 2021 - 07:10 Updated: Mar 17, 2021 - 07:10

3124

ନୂଆଦିଲ୍ଲୀ: ଦୁଷ୍କର୍ମ ପୀଡ଼ିତା, ନାବାଳିକା ଏବଂ ଦିବ୍ୟାଙ୍ଗଙ୍କ ଭଳି କିଛି ସ୍ୱତନ୍ତ୍ର ଶ୍ରେଣୀର ମହିଳାଙ୍କ ପାଇଁ ଗର୍ଭପାତ ଅନୁମତି ନିମନ୍ତେ ରହିଥିବା ସର୍ବାଧିକ ସମୟ ସୀମା ୨୦ ସପ୍ତାହ ପରିବର୍ତ୍ତେ ୨୪ ସପ୍ତାହକୁ ବୃଦ୍ଧି କରାଯାଇଛି । ରାଜ୍ୟସଭାରେ ବାଚନିକ ଭୋଟରେ ଏହି ବିଲ ଗୃହୀତ ହୋଇଛି । ବର୍ଷକ ପୂର୍ବରୁ ଉକ୍ତ ବିଲ ଲୋକସଭାରେ ଗୃହୀତ ହୋଇଥିଲା । ମେଡିକାଲ ଟର୍ମିନେସନ ଅଫ ପ୍ରେଗନାନ୍ସି (ଆମେଣ୍ଡମେଣ୍ଟ) ବିଲ ୨୦୨୦ କୁ ସ୍ୱାସ୍ଥ୍ୟମନ୍ତ୍ରୀ ଡ. ହର୍ଷବର୍ଦ୍ଧନ ଆଗତ କରିଥିଲେ । ବିଲକୁ ସିଲେକ୍ଟ କମିଟିକୁ ପଠାଇବା ଲାଗି ଦାବି ହୋଇଥିଲେ ମଧ୍ୟ ବାଚନିକ ଭୋଟରେ ତାହା ନାକଚ ହୋଇଯାଇଥିଲା । ନୂଆ ବିଲ ଗୃହୀତ ହେବା ପରେ ମେଡିକାଲ ଟର୍ମିନେସନ ଅଫ ପ୍ରେଗନାନ୍ସି ଆକ୍ଟ ୧୯୭୧ ରେ ସଂଶୋଧନ ହୋଇଛି । ବର୍ତ୍ତମାନ ନିୟମ ଅନୁସାରେ ଗର୍ଭଧାରଣର ୧୨ ସପ୍ତାହ ମଧ୍ୟରେ ଗର୍ଭପାତ ପାଇଁ ଜଣେ ଡାକ୍ତରଙ୍କ ପରାମର୍ଶ ଆବଶ୍ୟକ । ସେହିଭଳି ୧୨ ସପ୍ତାହରୁ ୨୦ ସପ୍ତାହ ମଧ୍ୟରେ ଗର୍ଭପାତ କରିବାକୁ ହେଲେ ଦୁଇ ଜଣ ଡାକ୍ତରଙ୍କ ପରାମର୍ଶ ଆବଶ୍ୟକ । କିନ୍ତୁ ନୂଆ ଆଇନରେ ଗର୍ଭଧାରଣର ୨୦ ସପ୍ତାହ ମଧ୍ୟରେ ଜଣେ ଡାକ୍ତରଙ୍କ ପରାମର୍ଶରେ ଗର୍ଭପାତ କରାଯାଇପାରିବ । ସେହିଭଳି ଦୁଇଜଣ ଡାକ୍ତରଙ୍କ ପରାମର୍ଶରେ ୨୦ ରୁ ୨୪ ସପ୍ତାହ ମଧ୍ୟରେ ଗର୍ଭପାତ କରାଯାଇପାରିବ ।