ଅଂଶୁଘାତ ପାଇଁ ସତର୍କ କରାଇଲା ଓସଡମା
ଅଂଶୁଘାତ ପାଇଁ ସତର୍କ କରାଇଲା ଓସଡମା
admin
6235
ଭୁବନେଶ୍ୱର: ଗୋଟିଏ ପଟେ ଦେଶ କରୋନାକୁ ନେଇ ଆତଙ୍କଜନକ ସ୍ଥିତିରେ ଥିବା ବେଳେ ଅନ୍ୟପଟେ ତାପମାତ୍ରା ବୃଦ୍ଧି କାରଣରୁ ଅଂଶୁଘାତ ଭୟ ସୃଷ୍ଟି ହେଲାଣି । ଏହାକୁ ଦୃଷ୍ଟିରେ ରଖି ଓସଡମାର ପରିଚାଳନା ନିର୍ଦ୍ଦେଶକ ତଥା ଅତିରିକ୍ତ ମୁଖ୍ୟ ଶାସନ ସଚିବ ପ୍ରଦୀପ କୁମାର ଜେନା ସବୁ ଜିଲ୍ଲାପାଳଙ୍କୁ ସତର୍କ କରାଇଛନ୍ତି । ଚିଠି ଲେଖି ଜଣାଇଛନ୍ତି ଯେ ତାପମାତ୍ରା ବୃଦ୍ଧି କାରଣରୁ ଅଂଶୁଘାତ ଆଶଙ୍କାକୁ ଏଡ଼ାଇ ଦେଇ ହେବ ନାହିଁ । ଏଣୁ କରୋନା ମୁକାବିଲା ସହିତ ଏ ଦିଗରେ ମଧ୍ୟ ଜିଲ୍ଲା ପ୍ରଶାସନ ତତ୍ପରତା ଦେଖାଇବା ଆବଶ୍ୟକ ।
ଶ୍ରୀ ଜେନା ତାଙ୍କ ଚିଠିରେ ଦର୍ଶାଇଛନ୍ତି ଯେ ଗ୍ରୀଷ୍ମଋତୁ ପାଇଁ ସତର୍କ ରହିବା ଲାଗି ଓସଡମା ପୂର୍ବରୁ ସତର୍କ କରାଇଥିଲା । ଏବେ କିନ୍ତୁ ହଠାତ୍ ଦେଖାଦେଇଛି ଯେ ତାପମାତ୍ରା ବଢ଼ିବା ଆରମ୍ଭ କଲାଣି । ଏହା ମଣିଷ, ପଶୁ, ଆଦିଙ୍କ ପ୍ରତି ବିପଦ ବଢ଼ାଉଛି । ବିଶେଷ କରି ଉପକୂଳ ଓ ଆଭ୍ୟନ୍ତରୀଣ ଓଡ଼ିଶାରେ ସର୍ବୋଚ୍ଚ ତାପମାତ୍ରା ନିୟମିତ ଭାବେ ବଢ଼ି ଚାଲିଛି । ଯଦି ଏହି ଧାରାରେ ତାପମାତ୍ରା ବଢ଼ିଚାଲେ, ତେବେ ଯେକୌଣସି ମୁହୂର୍ତ୍ତରେ ଭାରତର ପାଣିପାଗ ବିଭାଗ ଅଂଶୁଘାତ କଟକଣା ଜାରି କରିପାରନ୍ତି । ଏଣୁ ବେଳ ଥାଉ ଥାଉ ଜିଲ୍ଲାପାଳମାନେ ଏଥିପ୍ରତି ସତର୍କ ରହିବା ସବୁ ଲାଇନ ବିଭାଗକୁ ନେଇ ପ୍ରସ୍ତୁତି ବୈଠକ କରିବା ଦରକାର । କେବଳ ସେତିକି ନୁହେଁ, ଜିଲ୍ଲା ସବଡିଭିଜନ ଓ ବ୍ଲକସ୍ତରରେ ଅଂଶୁଘାତ -୨୦୨୦ ପାଇଁ ଜାରି କରାଯାଇଥିବା ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଡିଓର (ଏସଓପି) ପାଳନ ପାଇଁ ସମୀକ୍ଷା ଆଦି ହେବା ଉଚିତ । ଅନ୍ୟଥା ଅଂଶୁଘାତ ଜଟିଳ ସମସ୍ୟା ସୃଷ୍ଟି କରିପାରେ ।
ଉଲ୍ଲେଖ ଥାଉକି, ଓସଡମା ପକ୍ଷରୁ ପୂର୍ବରୁ ଜିଲ୍ଲାପାଳମାନଙ୍କୁ ଅଂଶୁଘାତ ଯୋଜନା-୨୦୨୦ ପଠାଇଥିଲା । ଯେଉଁଥରେ କି ବିଭିନ୍ନ ବିଭାଗର ଦାୟିତ୍ୱ ଓ ସମନ୍ୱୟ ରକ୍ଷା କରି କିଭଳି ଏହାର ମୁକାବିଲା ଦିଗରେ ପଦକ୍ଷେପ ନିଆଯାଇପାରିବ, ସେ ନେଇ ଦର୍ଶାଯାଇଥିଲା । ଅଂଶୁଘାତ ମୁକାବିଲା କାର୍ଯ୍ୟରେ କୌଣସି ସମସ୍ୟା ଉପୁଜିଲେ ତୁରନ୍ତ ସେ ସଂକ୍ରାନ୍ତରେ ଉଚ୍ଚ କର୍ତ୍ତୃପକ୍ଷଙ୍କୁ ଜଣାଇବାକୁ ଏଥିରେ କୁହାଯାଇଥିଲା ।
