ରାଜଧାନୀ ଉପକଣ୍ଠରେ ବୁଲୁଛନ୍ତି ବାଘ, ସିଂହ
admin
8480
ଭୁବନେଶ୍ୱର: ରାଜଧାନୀ ଉପକଣ୍ଠରେ ବୁଲୁଛନ୍ତି ବାଘ, ସିଂହ । ସିଟି ଡିଭିଜନ ଅନ୍ତର୍ଗତ ଘଙ୍ଗାପାଟଣା-ମେଣ୍ଢାଶାଳ ସଂରକ୍ଷିତ ଜଙ୍ଗଲରେ ଦିନରେ ବାଘ ଓ ରାତିରେ ସିଂହ ବୁଲୁଥିବା ଖବର ପ୍ରଚାରିତ ହୋଇଛି । ଏକ ସିଂହ ଏହି ଜଙ୍ଗଲରେ ବୁଲୁଥିବା ଭିଡିଓ ଭାଇରାଲ ହେବାରେ ଲାଗିଛି । ଯାହାକୁ ନେଇ ଲୋକଙ୍କ ମଧ୍ୟରେ ଆତଙ୍କ ଖେଳିଯାଇଛି । ଲୋକେ ତାଟିକବାଟ ଦେଇ ଘରେ ପଶିଛନ୍ତି । ବନବିଭାଗ କର୍ମଚାରୀ ପହଞ୍ଚି ଲୋକଙ୍କୁ ଏହା ଗୁଜବ ବୋଲି କହି ବୁଲୁଥିଲେ ମଧ୍ୟ ଆତଙ୍କ ଥମିନାହିଁ । ପ୍ରାପ୍ତ ସୂଚନା ଅନୁଯାୟୀ, ଘଙ୍ଗାପାଟଣାରେ ଥିବା କେରାଣ୍ଡିଆ ବନ୍ଧ ଉପରେ କିଛି ପାହୁଲ ଚିହ୍ନ ପଡ଼ିଥିବା ଲୋକେ ଦେଖି ଏହା ବାଘର ବୋଲି ପ୍ରଚାରିତ ହୋଇଥିଲା । ବାଘ ପାଦ ଚିହ୍ନ ଦେଖିବାକୁ ସେଠାରେ ଲୋକଙ୍କ ଭିଡ଼ ଜମିଥିଲା ।
ଖବରପାଇ ବନବିଭାଗ କର୍ମଚାରୀ ପହଞ୍ଚି ପାଦଚିହ୍ନର ମାପଚୁପ କରିଥିଲେ । ପ୍ଲାଷ୍ଟର ଅଫ୍ ପ୍ୟାରିସରେ ପାଦଚିହ୍ନର ନମୁନା ସଂଗ୍ରହ କରି ନେଇଥିଲେ । ଏହାପରେ ଲୋକଙ୍କ ଭୟ ବଢ଼ି ଯାଇଥିଲା । ସେପଟେ ରାତିରେ ଏକ ସିଂହ ବୁଲୁଥିବା ଭିଡିଓ ଭାଇରାଲ ହୋଇଥିଲା । ଯେଉଁଥିରେ ସିଂହଟି ଏକ ଜଙ୍ଗଲିଆ ଚଲା ରାସ୍ତାରେ ବୁଲୁଥିଲା । ଲୋକେ ପାଟିତୁଣ୍ଡ କରିବା ଯୋଗୁ ସିଂହଟି ଜଙ୍ଗଲ ଭିତରକୁ ପଳାଇ ଯିବାର ଦେଖା ଯାଇଥିଲା । କ୍ଷୀପ୍ରଗତିରେ ଭିଡିଓଟି ଭାଇରାଲ ହେବାପରେ ରାଜଧାନୀ ଉପକଣ୍ଠ ପାଇକରାପୁର, ମଦନପୁର, କଣ୍ଟାବାଡ଼ ଓ ଚନ୍ଦକା ପଞ୍ଚାୟତର ବିଭିନ୍ନ ଗ୍ରାମବାସୀଙ୍କ ମଧ୍ୟରେ ଆତଙ୍କ ଖେଳି ଯାଇଥିଲା ।
ଏନେଇ ନନ୍ଦନକାନନ କର୍ତ୍ତୃପକ୍ଷଙ୍କୁ ଯୋଗାଯୋଗ କରା ଯାଇଥିଲା । ନନ୍ଦନକାନନରୁ ସିଂହ ଖସି ବାହାରକୁ ଯିବା ଅସମ୍ଭବ ଏବଂ ଏହା ଗୁଜବ ବୋଲି ସେ କହିଥିଲେ । ଏନେଇ ସିଟି ଡିଏଫ୍ଓ ଡ.ଅଜିତ କୁମାର ଶତପଥୀ କହିଛନ୍ତି, ଏହି ଭିଡିଓଟି ୩ ବର୍ଷ ତଳର ।
