ପର୍ଫମାନ୍ସ ଗ୍ରେଡିଂ ଇଣ୍ଡେକ୍ସ-୨.୦ ରିପୋର୍ଟ : ଓଡ଼ିଶା ବହୁ ପଛରେ
admin
ଭୁବନେଶ୍ବର : ୨୦୨୧-୨୨ ଶିକ୍ଷାବର୍ଷ ପାଇଁ କେନ୍ଦ୍ର ଶିକ୍ଷା ମନ୍ତ୍ରାଳୟର ସ୍କୁଲ ଶିକ୍ଷା ବିଭାଗ ପକ୍ଷରୁ ପ୍ରକାଶିତ ପର୍ଫମାନ୍ସ ଗ୍ରେଡିଂ ଇଣ୍ଡେକ୍ସ (ପିଜିଆଇ)-୨.୦ରେ ଓଡ଼ିଶାର ପ୍ରଦର୍ଶନ ନୈରାଶ୍ୟଜନକ। ଶିକ୍ଷଣ ଫଳାଫଳ ଓ ଗୁଣବତ୍ତା, ବିଦ୍ୟାଳୟକୁ ପ୍ରବେଶ ସୁବିଧା, ଭିତ୍ତିଭୂମି ଓ ଅନ୍ୟାନ୍ୟ ସୁବିଧା, ସମାନତା, ଶାସନ ପ୍ରକ୍ରିୟା ଓ ଶିକ୍ଷକ ଶିକ୍ଷା ଓ ତାଲିମ ବିଷୟକୁ ନେଇ କରାଯାଇଥିବା ସର୍ଭେରେ ଓଡ଼ିଶା ବହୁ ପଛରେ ପଡ଼ିଛି। ୭୩ଟି ସୂଚକାଙ୍କ ଆଧାରରେ ୧୦୦୦ ପଏଣ୍ଟ(ସ୍କୋର)କୁ ନେଇ ୬ଟି ବର୍ଗରେ ମୂଲ୍ୟାୟନ ହୋଇଥିଲା। ସେଥିରୁ ଓଡ଼ିଶା ମାତ୍ର ୫୧୭.୧ ସ୍କୋର ହାସଲ କରି ଦେଶର ୩୬ଟି ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳ ମଧ୍ୟରୁ ୨୪ତମ ସ୍ଥାନରେ ରହିଛି। ୨୦୨୦-୨୧ ଶିକ୍ଷାବର୍ଷରେ ଓଡ଼ିଶା ୧୦ମ ସ୍ଥାନରେ ରହିଥିବା ବେଳେ ଏଥର ୧୪ଟି ସ୍ଥାନ ତଳକୁ ଖସିଛି। ଏଭଳି ପ୍ରଦର୍ଶନ ନେଇ ଶିକ୍ଷାବିତ୍ମାନେ ଚିନ୍ତା ପ୍ରକଟ କରିଛନ୍ତି। ଗୋଟିଏ ବର୍ଷ ମଧ୍ୟରେ କ’ଣ ଏମିତି ହେଲା ଯେ ଆର୍ଥିକ ସ୍ଥିତିରେ ଓଡ଼ିଶାଠାରୁ ଦୁର୍ବଳ ଥିବା ରାଜ୍ୟ ଉନ୍ନତ ପ୍ରଦର୍ଶନ କରି ଉପରକୁ ଉଠିଛନ୍ତି? ଓଡ଼ିଶା କାହିଁକି ତଳକୁ ଖସିଗଲା?
ମୋଟ ୧୦୦୦ ସ୍କୋରକୁ ୧୦ଟି ଗ୍ରେଡ୍ରେ ବିଭକ୍ତ କରାଯାଇଥିଲା। ୯୪୧ରୁ ୧୦୦୦ ମଧ୍ୟରେ ସ୍କୋର କରିଥିବା ରାଜ୍ୟକୁ ‘ଦକ୍ଷ’, ୮୮୧ରୁ ୯୪୦ ମଧ୍ୟରେ ‘ଉତ୍କର୍ଷ’, ୮୨୧-୮୮୦ ମଧ୍ୟରେ ‘ଅତି-ଉତ୍ତମ’, ୭୬୧-୮୨୦ ମଧ୍ୟରେ ‘ଉତ୍ତମ’, ୭୦୧-୭୬୦ ମଧ୍ୟରେ ‘ପ୍ରଚେଷ୍ଟା-୧’, ୬୪୧-୭୦୦ ମଧ୍ୟରେ ‘ପ୍ରଚେଷ୍ଟା-୨’, ୫୮୧-୬୪୦ ମଧ୍ୟରେ ‘ପ୍ରଚେଷ୍ଟା-୩’, ୫୨୧-୫୮୦ ମଧ୍ୟରେ ‘ଆଙ୍କାକ୍ଷୀ-୧’, ୪୬୧-୫୨୦ ମଧ୍ୟରେ ‘ଆଙ୍କାକ୍ଷୀ-୨’ ଓ ୪୦୧-୪୬୦ ମଧ୍ୟରେ ‘ଆଙ୍କାକ୍ଷୀ-୩’ ଗ୍ରେଡ୍ ରଖାଯାଇଛି। ସେହି ଅନୁଯାୟୀ ଦେଖିଲେ ଦକ୍ଷ, ଉତ୍କର୍ଷ, ଅତି-ଉତ୍ତମ, ଉତ୍ତମ, ପ୍ରଚେଷ୍ଟା-୧ ଗ୍ରେଡ୍ କୌଣସି ଗୋଟିଏ ବି ରାଜ୍ୟ ସ୍ଥାନ ପାଇ ନାହାନ୍ତି। ‘ପ୍ରଚେଷ୍ଟା-୨’ରେ ଚଣ୍ଡିଗଡ଼ ଓ ପଞ୍ଜାବ ସ୍ଥାନ ପାଇଥିବା ବେଳେ ‘ପ୍ରଚେଷ୍ଟା-୩’ରେ ଗୁଜୁରାଟ, କେରଳ, ମହାରାଷ୍ଟ୍ର, ଦିଲ୍ଲୀ, ପଣ୍ଡିଚେରି ଓ ତାମିଲନାଡ଼ୁ ରହିଛି। ‘ଆଙ୍କାକ୍ଷୀ-୧’ରେ ଆଣ୍ଡାମାନ ଓ ନିକୋବର ଦୀପପୁଞ୍ଜ ସମେତ କର୍ଣ୍ଣାଟକ, ଆନ୍ଧ୍ରପ୍ରଦେଶ, ଲକ୍ଷାଦୀପ, ଛତିଶଗଡ଼, ମଧ୍ୟ ପ୍ରଦେଶ, ଦାମନ ଆଣ୍ଡ୍ ଡ୍ୟୁ, ରାଜସ୍ଥାନ, ହରିୟାଣା, ପଶ୍ଚିମବଙ୍ଗ, ହିମାଚଳ ପ୍ରଦେଶ ସ୍ଥାନ ପାଇଛନ୍ତି। ଯେତେବେଳେ ଓଡ଼ିଶା ସମେତ ଆସାମ, ନାଗାଲ୍ୟାଣ୍ଡ, ବିହାର, ଜାମ୍ମୁ ଓ କାଶ୍ମୀର, ତେଲେଙ୍ଗାନା, ଝାଡ଼ଖଣ୍ଡ, ତ୍ରିପୁରା, ଲାଦାଖ, ଉତ୍ତରାଖଣ୍ଡ, ମଣିପୁର ଓ ଉତ୍ତର ପ୍ରଦେଶ ‘ଆଙ୍କାକ୍ଷୀ-୨’ ଗ୍ରେଡ୍ ହାସଲ କରିଛନ୍ତି। ‘ଆଙ୍କାକ୍ଷୀ-୩’ରେ ଅରୁଣାଚଳ ପ୍ରଦେଶ, ମେଘାଳୟ ଓ ମିଜୋରାମ ସ୍ଥାନ ପାଇଛନ୍ତି।
