ବଦଳିବେ ୨୦ ଜିଲ୍ଲା କଂଗ୍ରେସ ସଭାପତି
admin
ଭୁବନେଶ୍ୱର : ଖୁବଶୀଘ୍ର ପିସିସି ସଭାପତି ଶରତ ପଟ୍ଟନାୟକ ଗଢ଼ିବେ ନୂଆ ଟିମ୍ । ନୂଆ ଟିମରେ ଅନେକ ପୁରୁଖା ନେତାଙ୍କୁ ବାଦ ଦିଆଯିବ । ନେତାଙ୍କୁ କାର୍ଯ୍ୟଦକ୍ଷତା ଆଧାରରେ ଦାୟିତ୍ୱ ଦିଆଯିବ । ପଦବୀ ନେଇ ବସି ପଡୁଥିବା ନେତାଙ୍କୁ ଦଳ ଆଉ ଗୁରୁତ୍ୱ ଦେବ ନାହିଁ । ଏମିତି ରଣନୀତି କରିଛନ୍ତି ଶରତ ।
ମିଳିଥିବା ସୂଚନା ଅନୁଯାୟୀ, ପାଖାପାଖି ୨୦ ଜିଲ୍ଲା କଂଗ୍ରେସ ସଭାପତିଙ୍କୁ ଶରତ ବଦଳାଇବେ । ନିକଟରେ ରାୟପୁର ଠାରେ ହୋଇଥିବା କଂଗ୍ରେସ ଅଧିବେଶନରେ ଜିଲ୍ଲା ସଭାପତି ଓ ପଦାଧିକାରୀ ନିଯୁକ୍ତି ନେଇ କେତେକ ଗାଇଡ଼ଲାଇନ ଦିଆଯାଇଥିଲା । ଯେଉଁ ନେତାମାନେ ଗୋଟିଏ ଜିଲ୍ଳାରେ ଲଗାତର ୫ ବର୍ଷ ଧରି ଜିଲ୍ଲା ସଭାପତି ରହିବେ ସେମାନଙ୍କୁ ବାଦ ଦିଆଯିବ । ଅର୍ଥାତ ସେମାନଙ୍କୁ ଆଉ ଜିଲ୍ଲା ସଭାପତି କରାଯିବ ନାହିଁ । ସେହିପରି କେତେକ ନେତା ବିଭିନ୍ନ ପିସିସି ସଭାପତିଙ୍କ ଅମଳରେ ସଭାପତି ଥିଲେବି କାମ କରୁନାହାନ୍ତି । ସଂଗଠନର ଧାର ଧରୁନାହାନ୍ତି । ସକ୍ରିୟ ନଥିବା ଜିଲ୍ଲା ସଭାପତିମାନଙ୍କୁ ବାଦ ଦେବା ପାଇଁ ଶରତ ନିଷ୍ପତି ନେଇଛନ୍ତି । ଶରତ ନିଜ ଟିମରେ ଯୁବବର୍ଗଙ୍କୁ ଫୋକସ କରିବେ ବୋଲି ଚର୍ଚ୍ଚା ହେଉଛି । ଆସନ୍ତା ସପ୍ତାହକ ଭିତରେ ଶରତ ନୂଆ ଟିମ ଗଠନ କରିବାକୁ ଯାଉଛନ୍ତି । ନିକଟରେ କଂଗ୍ରେସରେ ସାମିଲ ହୋଇଥିବା ବିଜୟ ପଟ୍ଟନାୟକଙ୍କୁ ମଧ୍ୟ ଗୁରୁ ଦାୟିତ୍ୱ ଦିଆଯିବାର ସମ୍ଭାବନା ରହିଛି ।
