ହସ୍ପିଟାଲ ପାଇଁ ବାଗଚୀ ଦମ୍ପତି ଦେବେ ୩୪୦ କୋଟି

କ୍ୟାନସର ହସପିଟାଲ ପାଇଁ ୨୧୦ କୋଟିର ସହାୟତା ଦେବେ ବାଗଚୀ ଦମ୍ପତି ପାଲିଏଟିଭ କେୟାର ହସପିଟାଲରେ ଖର୍ଚ୍ଚ ହେବ ୧୩୦ କୋଟି ଭୁବନେଶ୍ୱର : ଓଡ଼ିଶାରେ ସୁବ୍ରତ ବାଗଚି ଓ ସୁସ୍ମିତା ବାଗଚି ଦୁଇଟି ବଡ଼ ମେଡ଼ିକାଲ ପ୍ରତିଷ୍ଠା କରିବେ । ଏଥିପାଇଁ ବାଗଚୀ ଦମ୍ପତି ୩୪୦ କୋଟି ଟଙ୍କାର ସହାୟତା ପ୍ରଦାନ କରିବେ । ବାଗଚି-ଶ୍ରୀଶଙ୍କର ହସପିଟାଲ ଏବଂ ଗବେଷଣା କେନ୍ଦ୍ର ଏବଂ ବାଗଚି କରୁଣାଶ୍ରୟ ପାଲିଏଟିଭ କେୟାର ସେଂଟର ପ୍ରତିଷ୍ଠା ପାଇଁ ରାଜ୍ୟ କ୍ୟାବିନେଟ ଅନୁମୋଦନ ପ୍ରଦାନ କରିଛନ୍ତି । ଏହି ଦୁଇ ମେଡ଼ିକାଲ ପାଇଁ ରାଜ୍ୟ ସରକାର ମାଗଣାରେ ୨୦ ଏକର ଲେଖାଏଁ ଜମି ଯୋଗାଇଦେବେ । ଅପରପକ୍ଷରେ କ୍ୟାନସର ହସପିଟାଲରେ ୫୦% ରୋଗୀ ମାଗଣା ଓ ସରକାରୀ ସ୍ୱାସ୍ଥ୍ୟ ଯୋଜନା ଅଧିନରେ ଚିକିତ୍ସା ପାଇବାର ଥିବାବେଳେ ପାଲିଏଟିଭ କେୟାର ହସପିଟାଲରେ ସମ୍ପୂର୍ଣ୍ଣ ମାଗଣା ସ୍ୱାସ୍ଥ୍ୟସେବା ପ୍ରଦାନ କରାଯିବ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ରାଜ୍ୟ କ୍ୟାବିନେଟର ଏକ ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହୋଇଯାଇଛି । ବୈଠକରେ ୯ଟି ଗୁରୁତ୍ୱପୂର୍ଣ୍ଣ ପ୍ରସ୍ତାବ ଉପରେ କ୍ୟାବିନେଟର ମୋହର ଲାଗିଛି । ଗୁରୁତ୍ୱପୂର୍ଣ୍ଣ ନିଷ୍ପତି କ୍ରମେ ରାଜ୍ୟ କ୍ୟାବିନେଟରେ ବାଗଚି-ଶ୍ରୀ ଶଙ୍କର କର୍କଟ ହସପିଟାଲ ଏବଂ ଗବେଷଣା କେନ୍ଦ୍ର ପ୍ରତିଷ୍ଠାନ ଓ ବାଗଚି କରୁଣାଶ୍ରୟ ପାଲିଏଟିଭ କେୟାର ସେଂଟର ପ୍ରତିଷ୍ଠା ଉପରେ ମୋହର ଲାଗିଛି । ଶ୍ରୀଶଙ୍କର କର୍କଟ ଚିକିତ୍ସା ଫାଉଣ୍ଡେସନ ଭୁବନେଶ୍ୱରରେ ଉକôର୍ଷ କ୍ୟାନସର ହସପିଟାଲ ପ୍ରତିଷ୍ଠା କରିବେ । ଉକ୍ତ କ୍ୟାନସର ହସପିଟାଲ ପାଇଁ ସୁବ୍ରତ ବାଗଚି ଓ ସୁସ୍ମିତା ବାଗଚି ୨୧୦ କୋଟି ଟଙ୍କାର ସହାୟତା ପ୍ରଦାନ କରିବେ । ଭୁବନେଶ୍ୱର ଇନଫୋସିଟି-୨ ନିକଟରେ ଏଥିପାଇଁ ରାଜ୍ୟ ସରକାର ମାଗଣାରେ ୨୦ ଏକର ଜମି ଯୋଗାଇଦେବେ । ୨୦୨୪ ସୁଦ୍ଧା ୨୫୦ ଶଯ୍ୟା ବିଶିଷ୍ଟ ହସପିଟାଲଟି କାର୍ଯ୍ୟକ୍ଷମ ହେବାର ଥିବାବେଳେ ପରବର୍ତୀ ସମୟରେ ତାହା ୫୦୦ ଶଯ୍ୟାକୁ ସମ୍ପ୍ରସାରିତ ହେବାର ଲକ୍ଷ୍ୟ ରହିଛି । ଏହି ହସପିଟାଲରେ ସମ୍ପୂର୍ଣ୍ଣ ମାଗଣା ଚିକିତ୍ସା ପାଇଁ ସ୍ୱତନ୍ତ୍ର ଭାବେ ୨୫% ଶଯ୍ୟାର ବ୍ୟବସ୍ଥା କରାଯିବ । ଅନ୍ୟ ୨୫% ଶଯ୍ୟା ବିଭିନ୍ନ ସରକାରୀ ସ୍ୱାସ୍ଥ୍ୟ ଯୋଜନା ଅଧିନରେ ସମର୍ଥିତ ରୋଗୀଙ୍କ ପାଇଁ ଉଦ୍ଧିଷ୍ଟ ରହିବ । ଅବଶିଷ୍ଟ ୫୦% ରୋଗୀ ସେବା ପାଇଁ ଦେୟ ଦେବାକୁ ପଡ଼ିବ । ଏହି ସଂଗୃହୀତ ଅର୍ଥ ଗରିବ ରୋଗୀଙ୍କ ସହାୟତା ଓ ଡାକ୍ତରଖାନାର ସମ୍ପ୍ରସାରଣ ନିମନ୍ତେ ବ୍ୟବହୃତ କରାଯିବ । ସେହିପରି ପ୍ରଥମ ଥର ପାଇଁ ରାଜ୍ୟରେ ପାଲିଏଟିଭ କେୟାର ହସପିଟାଲ ପ୍ରତିଷ୍ଠା କରାଯିବ । ବାଙ୍ଗାଲୋର ଭିତିକ କରୁଣାଶ୍ରୟ ହସପିସ ଟ୍ରଷ୍ଟ ଏହି ହସପିଟାଲ ପ୍ରତିଷ୍ଠା କରିବା ପାଇଁ ଆଗ୍ରହ ପ୍ରକାଶ କରିଥିବାବେଳେ ବାଗଚୀ ଦମ୍ପତି ଏଥିପାଇଁ ୧୩୦ କୋଟିର ସହାୟତା ପ୍ରଦାନ କରିବେ । ପ୍ରଥମେ ୧୦୦ ଶଯ୍ୟା ବିଶିଷ୍ଟ ମେଡ଼ିକାଲ କାର୍ଯ୍ୟକ୍ଷମ ହେବାର ଥିବାବେଳେ ପରେ ଏହା ସମ୍ପ୍ରସାରିତ ହେବ । ଏଠାରେ ରୋଗୀଙ୍କୁ ଶତ ପ୍ରତିଶତ ମାଗଣାରେ ଚିକିତ୍ସା ପ୍ରଦାନ କରାଯିବ । ଏହି ମେଡ଼ିକାଲ ପାଇଁ ରାଜ୍ୟ ସରକାର ଇନଫୋଭାଲି ନିକଟରେ ମାଗଣାରେ ୨୦ ଏକର ଜାଗା ପ୍ରଦାନ କରିବେ ।