ସେପ୍ଟେମ୍ବରରେ ବିଧାନସଭା ମୌସୁମୀ ଅଧିବେଶନ

Aug 17, 2020 - 06:30 Updated: Aug 17, 2020 - 06:30

1951

ଭୁବନେଶ୍ୱର: ଆସନ୍ତା ସେପ୍ଟେମ୍ବରରେ ବିଧାନସଭା ମୌସୁମୀ ଅଧିବେଶନ ଡକାଯିବ । କିନ୍ତୁ କୋଭିଡ ମହାମାରୀ ଦୃଷ୍ଟିରୁ ବିଧାନସୌଧରେ ହେବ କି ବାହାରେ ହେବ, ସେ ନେଇ ଠୋସ ନିଷ୍ପତ୍ତି ହୋଇପାରିନି । ଏ ସମ୍ପର୍କରେ ସୂଚନା ଦେଇଛନ୍ତି ବାଚସ୍ପତି ସୂର୍ଯ୍ୟନାରାୟଣ ପାତ୍ର । ଅନ୍ୟ ପଟେ ବିରୋଧୀ କହିଛନ୍ତି ୬ ମାସ ଭିତରେ ବିଧାନସଭା ଡାକିବାର ନିୟମ ରହିଛି । କରୋନା ମହାମାରୀକୁ ଡରିଲେ ହେବନି । ଅଧିବେଶନରେ ସାମ୍ବାଦିକମାନଙ୍କୁ ଆସିବାକୁ ଅନୁମତି ଦିଆନଗଲେ ବିଧାନସଭା ଡାକିବାର ଅର୍ଥ କିଛି ରହିବନି । ଏ ନେଇ ଅଗଷ୍ଟ ୨୦ ଓ ୨୧ରେ ଅନୁଷ୍ଠିତ ହେବାକୁ ଥିବା ବିଧାନସଭା ଷ୍ଟାଣ୍ଡିଂ କମିଟି ବୈଠକରେ ବିସ୍ତୃତ ଆଲୋଚନା ହେବାର ଅଛି । ଶ୍ରୀ ପାତ୍ର କହିଛନ୍ତି ଲକଡାଉନ ଭିତରେ ଗତ ମାର୍ଚ୍ଚ ମାସ ୩୦ ତାରିଖରେ ଶେଷ ଥର ପାଇଁ ଲୋକସେବା ଭବନରେ କନଭେନସନ ହଲରେ ବିଧାନସଭା ଅନୁଷ୍ଠିତ ହୋଇଥିଲା । ଆଇନ ଅନୁଯାୟୀ ୬ ମାସ ଭିତରେ ପୁଣି ଅଧିବେଶନ ବସିବା କଥା । ଏ ଦୃଷ୍ଟିରୁ ସେପ୍ଟେମ୍ବର ୩୦ ତାରିଖ ସୁଦ୍ଧା ମୌସୁମି ଅଧିବେଶନ ଡକାଯିବ । କିନ୍ତୁ କୋଭିଡ-୧୯ ମହାମାରୀ ଭିତରେ କିପରି ସାମାଜିକ ଦୂରତା ଓ ସରକାରୀ ନିଦେ୍ର୍ଧଶାବଳୀ ଅନୁପାଳନ କରିବା ପୂର୍ବକ ଅଧିବେଶନ ଡକାଯିବ ସେ ନେଇ ବିଚାର ବିମର୍ଶ ଚାଲିଛି । ଦୁଇ ଦିନ ତଳେ ରାଜସ୍ଥାନରେ ବିଧାନସଭା ଅଧିବେଶନ ଡକାଯାଇଥିଲା । ସେଠାରେ କିପରି ଅନୁଷ୍ଠିତ ହେଲା ସେ ନେଇ ସେଠାକାର ବିଧାନସଭା ବାଚସ୍ପତିଙ୍କ ସହ ଆଲୋଚନା କରାଯାଇଛି । ଏହା ସହିତ କର୍ଣ୍ଣାଟକ ବିଧାନସଭା ବାଚସ୍ପତି, ଲୋକସେବା ଅଧ୍ୟକ୍ଷ, ଲୋକସେବା ଓ ରାଜ୍ୟସଭାର ଉଭୟ ମହାସଚିବଙ୍କ ସହ ମଧ୍ୟ ପରାମର୍ଶ କରାଯାଇଚି । ସାମାଜିକ ଦୂରତା ରକ୍ଷା କରିବା ସହିତ ସଂକ୍ରମଣ ପ୍ରତିହତ ପାଇଁ ରାଜ୍ୟ ସରକାରଙ୍କ ଦ୍ୱାରା ଲାଗୁ କରାଯାଇଥିବା ନିୟମ ଅନୁପାଳନ କରିବାକୁ ସମସ୍ତେ ପରାମର୍ଶ ଦେଇଛନ୍ତି । ଏ ନେଇ ମଧ୍ୟ ବିରୋଧୀ ଦଳ ନେତା, କଂଗ୍ରେସ ବିଧାୟକ ଦଳ ନେତା ଓ ସଂସଦୀୟ ବ୍ୟାପାର ମନ୍ତ୍ରୀଙ୍କ ସହ ଆଲୋଚନା ହୋଇଛି । ଆସନ୍ତା ୬ ଦିନ ଭିତରେ ରାଜ୍ୟପାଳ, ସରକାରଙ୍କ ସହ ଆଲୋଚନା କରାଯାଇ ନିଷ୍ପତ୍ତି ନିଆଯିବ ବୋଲି ବାଚସ୍ପତି ସୂଚନା ଦେଇଛନ୍ତି ।