ସଚିନଙ୍କ ମହାନତା, ୫,୦୦୦ ଲୋକଙ୍କୁ ଦେବେ ଗୋଟିଏ ମାସର ରାସନ
ସଚିନଙ୍କ ମହାନତା, ୫,୦୦୦ ଲୋକଙ୍କୁ ଦେବେ ଗୋଟିଏ ମାସର ରାସନ
admin
5035
କିମ୍ବଦନ୍ତୀ ବ୍ୟାଟସ୍ମ୍ୟାନ ସଚିନ ତେନ୍ଦୁଲକର କରୋନା ଭାଇରସ ମୁକାବିଲାରେ ସାମିଲ ହେବା ସହ ନିୟମିତ ଭାବେ ଦେଶବାସୀଙ୍କୁ ସଚେତନତାର ବାର୍ତ୍ତା ଦେଇ ଆସିଛନ୍ତି । ସେ ପୂର୍ବରୁ ପ୍ରଧାନମନ୍ତ୍ରୀଙ୍କ ରିଲିଫ ପାଣ୍ଠିକୁ (କେୟାର୍ସ) ଏବଂ ମହାରାଷ୍ଟ୍ର ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠିକୁ ୨୫ ଲକ୍ଷ ଟଙ୍କା ଲେଖାଏଁ ସହାୟତା ରାଶି ପ୍ରଦାନ କରି ସାରିଛନ୍ତି । ସେ ଆଉ ଏକ ବଡ଼ ପଦକ୍ଷେପ ଗ୍ରହଣ କରି ଚର୍ଚ୍ଚାର କେନ୍ଦ୍ରବିନ୍ଦୁ ସାଜିଛନ୍ତି । ସେ ଅପନାଳୟ ଏନଜିଓ ସଂସ୍ଥା ଜରିଆରେ ମୁମ୍ବାଇରେ ଶିବାଜୀ ନଗର ଏବଂ ଗୋଭଣ୍ଡି ଅଞ୍ଚଳର ୫,୦୦୦ ଲୋକଙ୍କୁ ଗୋଟିଏ ମାସର ରାସନ ଯୋଗାଇ ଦେବାକୁ ଘୋଷଣା କରିଛନ୍ତି ।
ଅପନାଳୟ ଏନଜିଓ ସଂସ୍ଥା ଏ ବିଷୟରେ ସୂଚନା ଦେବା ସହ ସଚିନଙ୍କଏହି ପ୍ରୟାସକୁ ପ୍ରଶଂସା କରିଛି । ସଂସ୍ଥା ପକ୍ଷରୁ କୁହାଯାଇଛି, ଲକଡାଉନ ସମୟରେ ସହଯୋଗର ହାତ ବଢ଼ାଇଥିବାରୁ ସଚିନ ତେନ୍ଦୁଲକରଙ୍କୁ ଧନ୍ୟବାଦ । ସେ ୫,୦୦୦ ଲୋକଙ୍କୁ ଗୋଟିଏ ମାସର ରାସନ ଯୋଗାଇ ଦେବେ । ଅନେକ ବ୍ୟକ୍ତି ଅଛନ୍ତି ଯେଉଁମାନଙ୍କୁ ଆପଣଙ୍କ ଏବଂ ଅନ୍ୟମାନଙ୍କ ସହଯୋଗର ଆବଶ୍ୟକତା ରହିଛି । ସଂସ୍ଥା ପକ୍ଷରୁ ବିଭିନ୍ନ ଉଦ୍ୟୋଗୀଙ୍କୁ ମଧ୍ୟ ଦାନ କରିବାକୁ ନିବେଦନ କରାଯାଇଛି ।’ ଅନ୍ୟ ପକ୍ଷରେ ସଚିନ ଅପନାଳୟ ଏନଜିଓକୁ ଧନ୍ୟବାଦ ଜଣାଇବାକୁ ଭୁଲି ନାହାନ୍ତି । ସେ ଟ୍ୱିଟ୍ କରି କହିଛନ୍ତି, ଅପନାଳୟକୁ ମୋର ଶୁଭେଚ୍ଛା । ଚିନ୍ତିତ ଓ ଗରିବମାନଙ୍କୁ ଆପଣଙ୍କ ସାହାଯ୍ୟ କରିବାର ମହାନ କାର୍ଯ୍ୟ ଜାରି ରହୁ । ଭଲ କାମ କରିବା ଜାରି ରଖନ୍ତୁ ।’
