ମାଟିହାଣ୍ଡି କଙ୍କଡା ତରକାରୀ ଆଜି ବନାଇ ଖାଆନ୍ତୁ : ସ୍ୱାଦ ଚାଖି ଆପଣ ବି କହିବେ ୱାହ ୱାହ
ମାଟିହାଣ୍ଡି କଙ୍କଡା ତରକାରୀ ଆଜି ବନାଇ ଖାଆନ୍ତୁ : ସ୍ୱାଦ ଚାଖି ଆପଣ ବି କହିବେ ୱାହ ୱାହ
admin
5780
ମାଟିହାଣ୍ତି ପ୍ରସ୍ତୁତ ଖାଦ୍ୟର ସ୍ୱାଦ ସବୁ ବେଳେ ନିଆରା। ଯୁଗ ଯେତେ ଆଗେଇଲେ ବି ମାଟି ହାଣ୍ଡିର ବିକଳ୍ପ ନାହିଁ। ପ୍ରେସର କୁକର୍ ଯୁଗରେ ଆଜି ବି ମାଟିହାଣ୍ଡିର ଚାହିଦା ରହିଛି। ବାହାର ତେଲ ମସଲାଯୁକ୍ତ ଖାଦ୍ୟ ବଦଳରେ ଘରେ ପ୍ରସ୍ତୁତ କରନ୍ତୁ ଓଡ଼ିଆ ପାରମ୍ପରିକ ଖାଦ୍ୟ। ଜାଣି ରଖନ୍ତୁ ଘରେ କେମିତି ପ୍ରସ୍ତୁତ କରିବେ ସ୍ୱାଦିଷ୍ଟ ମାଟିହାଣ୍ଡି କଙ୍କଡ଼ା।
ଆବଶ୍ୟକ ସାମଗ୍ରୀ-
କଙ୍କଡ଼ା, ତେଲ, ହଳଦୀ ଗୁଣ୍ଡ, ଲଙ୍କା ଗୁଣ୍ଡ, ଜିରା ଗୁଣ୍ଡ, ଧଣିଆ ଗୁଣ୍ଡ, କଟା ପିଆଜ, ପିଆଜ ବଟା, ଅଦା ରସୁଣ ବଟା, ଟମାଟୋ ବଟା ବା ପେଷ୍ଟ୍, ଗରମ ମସଲା, ତେଜପତ୍ର, ପଞ୍ଚଫୁଟଣ ଓ ଲୁଣ।
ପ୍ରସ୍ତୁତି ପ୍ରଣାଳୀ
ପ୍ରଥମେ କଙ୍କଡ଼ାକୁ ପରିଷ୍କାର କରି ଧୋଇ ଦିଅନ୍ତୁ। ଯଦି ଜୀଅନ୍ତା କଙ୍କଡ଼ା ଥିବେ ତେବେ ପ୍ରଥମେ ଗୋଡ଼ ଭାଙ୍ଗି ଦିଅନ୍ତୁ। ମନେ ରଖନ୍ତୁ, ଏହାକୁ ଗରମ ପାଣିରେ ସିଝାଇବେ ନାହିଁ । କାରଣ ସବୁତକ ଫ୍ଲେଭର୍ ଗରମ ପାଣିରେ ହିଁ ନଷ୍ଟ ହୋଇଯିବ। ତେଣୁ କଙ୍କଡ଼ାକୁ ଧୋଇସାରିବା ପରେ ଏହାପରେ ସେଥିରେ ଅଳ୍ପ ଲୁଣ, ହଳଦୀ ଗୁଣ୍ଡ, ଅଦା ରସୁଣ ବଟା ଓ ପିଆଜ ବଟା ପକାଇ ୧୦ ରୁ୧୫ ମିନିଟ୍ ଗୋଳେଇ ରଖନ୍ତୁ। ତା’ ପରେ ଆରମ୍ଭ କରନ୍ତୁ ରୋଷେଇ।
ଏବେ ମାଟି ହାଣ୍ଡିରେ ତେଲ ପକାନ୍ତୁ। ତେଲ ଗରମ ହୋଇଗଲେ ସେଥିରେ ପ୍ରଥମେ ତେଜପତ୍ର, ଫୁଟଣ ଓ କଟା ପିଆଜ ପକାନ୍ତୁ। ପିଆଜ ଭାଜି ହୋଇଗଲେ ସେଥିରେ ପର୍ଯ୍ୟାୟକ୍ରମେ ଅଦା ରସୁଣ ବଟା, ପିଆଜ ବଟା, ଲଙ୍କାଗୁଣ୍ଡ, ହଳଦୀ ଗୁଣ୍ଡ, ଜିରାଗୁଣ୍ଡ, ଧଣିଆଗୁଣ୍ଡ ପକାଇ ମସଲା କଷନ୍ତୁ। ମସଲା କଷା ହୋଇଗଲା ପରେ ପୂର୍ବରୁ ରଖିଥିବା କଙ୍କଡ଼ାକୁ ସେଥିରେ ପକାଇ ଭଲଭାବେ କଶନ୍ତୁ। କଙ୍କଡ଼ା ସିଝିଗଲାପରେ ଟମାଟୋ ବଟା ଓ ସାମାନ୍ୟ ପାଣି ଦେଇ ୫ ମିନିଟ୍ ଛାଡ଼ି ଦିଅନ୍ତୁ। ଏହା ପରେ ସେଥିରେ ଗରମ ମସଲା ପକାଇ କିଛି ସମୟ ପରେ ନିଆଁରୁ ହାଣ୍ଡିକୁ ଓହ୍ଲାଇଦିଅନ୍ତୁ। ବାସ୍, ରୋଷେଇ ଶେଷ।
