କାହିଁକି ପିପିଲି ଗଲେନି ନବୀନ, ଜାଣନ୍ତୁ
କାହିଁକି ପିପିଲି ଗଲେନି ନବୀନ, ଜାଣନ୍ତୁ
admin
ଭୁବନେଶ୍ୱର : ସେପ୍ଟେମ୍ବର ୩୦ରେ ପିପିଲି ଉପନିର୍ବାଚନ । ତିନି ତିନି ଥର ନିର୍ବାଚନ ଘୁଂଚିବା ପରେ ଏବେ ପିପିଲି ରାଜନୀତି ଆଉ ସେତେଟା ସରଗରମ ବି ନାହିଁ । ଅନେକ ଦଳର ତାରକା ପ୍ରଚାରକମାନେ ସେଭଳି ଘମାସାନ ପ୍ରଚାର କରୁଥିବା ବି ଦେଖିବାକୁ ମିଳୁନାହିଁ । ତେବେ ଗୁରୁତ୍ୱପୂର୍ଣ୍ଣ କଥା ହେଉଛି, ପ୍ରତି ନିର୍ବାଚନକୁ ଗୁରୁତର ସହ ଗ୍ରହଣ କରି ପ୍ରଚାରରେ ଅବହେଳା କରୁନଥିବା ବିଜେଡ଼ି ସୁପ୍ରିମୋ ନବୀନ ପଟ୍ଟନାୟକ ବି ପିପିଲି ପ୍ରଚାର ଉପରେ ଗୁରୁତ୍ୱ ଦେଇନାହାନ୍ତି । ସେଠାକୁ ଯିବା କଥା ତ ଦୂରରେ ଥାଉ, ଭର୍ଚୁଆଲ ମାଧ୍ୟମରେ ବି ପ୍ରଚାର କରିବେ କି ନାହିଁ ତାହା ଜଣାପଡ଼ିନାହିଁ ।
ପିପିଲି ପାଇଁ ଏବେ ପ୍ରଚାର ଚାଲିଛି । ଆଜି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ପିପିଲିରେ ବିଜେପି ପ୍ରାର୍ଥୀଙ୍କ ପାଇଁ ପ୍ରଚାର କରିଛନ୍ତି । ରୋଡ଼ଶୋ’ କରି ଜନମତକୁ ନିଜ ଆଡ଼କୁ ଟାଣିବା ପାଇଁ ପ୍ରୟାସ କରିଛନ୍ତି । ଅପରପକ୍ଷରେ ନବୀନ କିନ୍ତୁ ଏବେ ଦିଲ୍ଲୀରେ । ଆସନ୍ତା ୨୬ରେ ଅମିତ ଶାହାଙ୍କ ଅଧ୍ୟକ୍ଷତାରେ ଅନୁଷ୍ଠିତ ହେବାକୁ ଥିବା ବୈଠକରେ ଯୋଗଦେବେ । ଏହାପରେ ସେ ଭୁବନେଶ୍ୱର ଫେରିବେ । ଯେତେବେଳେକି ନିର୍ବାଚନର ୭୨ ଘଂଟା ପୂର୍ବରୁ ପ୍ରଚାର ଶେଷ ହେବ । ଅର୍ଥାତ ନବୀନ ଆଉ ପିପିଲି ଯାଇ ପ୍ରଚାର କରିବେ ନାହିଁ ବୋଲି ଆପାତତଃ ନିଶ୍ଚିତ ହୋଇଯାଇଛି ।
ତେବେ କାହିଁକି ଗଲେନି ନବୀନ ? ଏହି ପ୍ରଶ୍ନ ଏବେ ରାଜନୀତିକ ଅଳିନ୍ଦରେ ଘୂରିବୁଲୁଛି । ତେବେ ଆମକୁ ମିଳିଥିବା ଖବର ଅନୁଯାୟୀ, ପିପିଲିରେ ଦଳର ପଲା ଭାରିରହିଛି ବୋଲି ବିଜେଡ଼ି ଅଙ୍କ କଷିଛି । ପିପିଲି ନିର୍ବାଚନ ପୂର୍ବରୁ ନବୀନ ସେଠାରେ ବହୁ ପ୍ରକଳ୍ପ ସଂକ୍ରାନ୍ତରେ ଘୋଷଣା କରିସାରିଛନ୍ତି । ପ୍ରଥମ ଥର ନିର୍ବାଚନ ବାତିଲ ହୋଇଥିଲେବି ନବୀନ ଭର୍ଚୁଆଲ ମାଧ୍ୟମରେ ଉଦବୋଧନ ଦେଇଥିଲେ । ସେତେବେଳେ ବିରୋଧୀଙ୍କର ଯେତିକି ଦବଦବା ଥିଲା ଆଉ ସେତିକି ଦବଦବା ନାହିଁ ବୋଲି ନବୀନଙ୍କୁ ବିଜେଡ଼ିର ନେତାମାନେ କହିସାରିଛନ୍ତି । ଅର୍ଥାତ ବିଜେଡ଼ିର ବିଜୟ ପାଇଁ ଆଉ ନବୀନଙ୍କୁ ପ୍ରଚାର କରିବାକୁ ପଡ଼ିବ ନାହିଁ ଦଳର ନେତାମାନେ ତଥ୍ୟଭିତିକ ରିପୋର୍ଟ ପ୍ରଦାନ କରିଛନ୍ତି ।
ଦ୍ୱିତୀୟ କଥାଟି ହେଉଛି, କୋଭିଡ଼ କଟକଣା ଭିତରେ ନିର୍ବାଚନ ପ୍ରଚାର କରାଯିବ । ଅତିବେଶୀରେ ହଜାରେ ଲୋକ ଯୋଗଦେଇପାରିବେ । ମୁଖ୍ୟମନ୍ତ୍ରୀଙ୍କ ପ୍ରଚାର ସଭାରେ ସବୁବେଳେ ଅତିକମରେ ଦଶ କୋଡ଼ିଏ ହଜାର ଲୋକ ସାମିଲ ହୋଇଥା’ନ୍ତି । ଏମିତିକି ଭର୍ଚୁଆଲ ସଭାରେ ବି ହଜାର ହଜାର ଲୋକ ଗଦା ହୋଇଥା’ନ୍ତି । ତେଣୁ ଏଭଳି କରି ନବୀନ ବଦନାମ ହେବାକୁ ଚାହାନ୍ତି ନାହିଁ । ଜଣେ ମୁଖ୍ୟମନ୍ତ୍ରୀ କୋଭିଡ଼ କଟକଣା ଭାଙ୍ଗୁଛନ୍ତି ବୋଲି ସେ ବାର୍ତା ଦେବାକୁ ଚାହୁଁନାହାଁନ୍ତି । ଅନ୍ୟ ରାଜ୍ୟରେ ମୁଖ୍ୟମନ୍ତ୍ରୀମାନେ କୋଭିଡ଼ କଟକଣାକୁ ଖୁଲମଖୁଲା ଉଲ୍ଳଂଘନ କରୁଥିବାର ନଜିର ଥିବାବେଳେ ନବୀନଙ୍କ ନାମରେ ସେଭଳି ଅଭିଯୋଗ ନାହିଁ । ତେଣୁ ଜାତୀୟସ୍ତରରେ ବି ନିଜର ଛବିକୁ ସେ ମଳିନ କରିବାକୁ ଚାହୁଁନାହାନ୍ତି । ଯେଉଁଥିପାଇଁ ପିପିଲି ପ୍ରଚାର ଉପରେ ନବୀନ ଫୋକସ କରିନାହାନ୍ତି ।
