ଆଇସିସି ହଲ୍ ଅଫ ଫେମରେ ୩ ନୂତନ ଖେଳାଳି
ଆଇସିସି ହଲ୍ ଅଫ ଫେମରେ ୩ ନୂତନ ଖେଳାଳି
admin
3300
ଦୁବାଇ : ରବିବାର ଆଇସିସିର ହଲ ଅଫ ଫେମରେ ତିନି ଖେଳାଳିଙ୍କୁ ସାମିଲ କରାଯାଇଛି । ଦିନିକିଆ କ୍ରିକେଟର ମହାନ ଅଲରାଉଣ୍ଡର ଜ୍ୟାକ୍ କାଲିସ୍, ପାକିସ୍ତାନର ଜାହିର ଆବାସ ଏବଂ ଅଷ୍ଟ୍ରେଲିଆର ମହିଳା ଖେଳାଳି ଲିସା ସ୍ଥାଲେକରଙ୍କୁ ଏହି ତାଲିକାରେ ସାମିଲ କରାଯାଇଛି । କରୋନା କାରଣରୁ ସୋସିଆଲ ମିଡିଆରେ ଏହି ତାଲିକା ଘୋଷଣା କରାଯାଇଥିଲା । ଆଲାନ ୱିଲିକିନସ, ସୁନୀଲ ଗାଭାସ୍କର, ମେଲ ଜୋନ୍ସ ଏବଂ ସନ୍ ପୋଲକଙ୍କ ଦ୍ୱାରା ଏହି ତାଲିକା ଘୋଷଣା କରାଯାଇଥିଲା ।
କାଲିସ ଉଭୟ ଦିନିକିଆ ଏବଂ ଟେଷ୍ଟରେ ୧୦ ହଜାରରୁ ଅଧିକ ରନ ସଂଗ୍ରହ କରିବା ସହିତ ୨୫୦ରୁ ଅଧିକ ୱିକେଟ ଅକ୍ତିଆର କରିଛନ୍ତି । ଏହା ସହିତ ଟେଷ୍ଟରେ ୪୫ଟି ଶତକ ହାସଲ କରିଛନ୍ତି ଏବଂ ୨୩ ଥର ମ୍ୟାନ ଅଫ ଦ ମ୍ୟାଚ ହୋଇଛନ୍ତି ।
ପାକିସ୍ତାନ ପାଇଁ ୭୮ଟି ଟେଷ୍ଟ ଏବଂ ୬୨ଟି ଦିନିକିଆ ଖେଳିଥିବା ଆବ୍ୱାସଙ୍କୁ ମଧ୍ୟ ଏହି ତାଲିକାରେ ସାମିଲ କରାଯାଇଛି । ଉଭୟ ଫର୍ମାଟରେ ଜାହିରଙ୍କ ଆଭରେଜ ୪୦ରୁ ଅଧିକ ରହିଛି । ଏହା ବ୍ୟତୀତ ଏକମାତ୍ର ଏସୀୟ ଖେଳାଳି ଭାବରେ ସେ ଘରୋଇ କ୍ରିକେଟରେ ୧୦୦ଟି ଶତକ ହାସଲ କରିଛନ୍ତି । ଜାହିର କ୍ରମାଗତ ୫ ମ୍ୟାଚରେ ଶତକ ହାସଲ କରିବାର ରେକର୍ଡ ମଧ୍ୟ ହାସଲ କରିଥିଲେ ।
ସେହିପରି ଏକମାତ୍ର ମହିଳା ଭାବରେ ଏହି ତାଲିକାରେ ସାମିଲ ହୋଇଛନ୍ତି ଅଷ୍ଟ୍ରେଲିଆର ଲିସା ସ୍ଥାଲେକର । ଦୁଇ ଥର ଲେଖାଏଁ ବିଶ୍ୱକପ ଏବଂ ଟି ୨୦ ବିଶ୍ୱକପ୍ ବିଜୟୀ ଦଳର ସଦସ୍ୟ ରହିଥିବା ସ୍ଥାଲେକର ୨୦୧୩ରେ ଅବସର ଘୋଷଣା କରିଥିଲେ । ଏହା ସହିତ ପ୍ରଥମ ମହିଳା ଭାବରେ ୧୦୦ ୱିକେଟ ଏବଂ ୧୦୦୦ ରନ୍ କ୍ଲବରେ ସାମିଲ ହୋଇଥିଲେ ।
