ହାଇକମାଣ୍ଡ ପାଖକୁ ଯିବୁ: ସାଲୁଜା

ଭୁବନେଶ୍ୱର: ନୟାଗଡ଼ର ଚର୍ଚ୍ଚିତ ‘ପରୀ’ ପ୍ରସଙ୍ଗକୁ ନେଇ ଏବେ ରାଜନୀତି ଜୋର ଧରିଛି । ଗୋଟିଏ ପଟେ ବିଜେପି କଂଗ୍ରେସର ନୀରବତାକୁ ନେଇ ପ୍ରଶ୍ନ ଉଠାଇ ଘେରିଛି । ଅପରପକ୍ଷରେ ପରୀ ପ୍ରସଙ୍ଗରେ କଂଗ୍ରେସ ଏବେ ଫାଳ ଫାଳ ହୋଇଯାଇଛି । ପରୀ ପ୍ରସଙ୍ଗରେ ଚୁପ ରହିବା ତଥା ଏହି ମାମଲାରୁ ଓହରିଯିବା ପାଇଁ ମ୍ୟାନେଜ ହୋଇଥିବା କଥା ଉଠିଥିବାବେଳେ ଏନେଇ କଂଗ୍ରେସ ବିଧାୟକ ସନ୍ତୋଷ ସିଂ ସାଲୁଜା ହାଇକମାଣ୍ଡ ପାଖକୁ ଯିବା ସମ୍ପର୍କରେ କହିଛନ୍ତି । ପ୍ରକାଶ ଯେ, ପ୍ରଥମେ ପରୀ ପ୍ରସଙ୍ଗରେ ଗୃହରେ ଚୁପ ରହିବାର କାରଣ କହିଥିଲେ କଂଗ୍ରେସ ବିଧାୟକ ସନ୍ତୋଷ ସିଂ ସାଲୁଜା । ଚୁପ ରହିବାର କାରଣ କଂଗ୍ରେସ ବିଧାୟକ ଦଳ ନେତା ଯାହା କହିଲେ ଆମେ ମାନିବାକୁ ବାଧ୍ୟ ବୋଲି ଶ୍ରୀ ସାଲୁଜା କହିଥିଲେ । ସେ କହିଥିଲେ ଯେ, କଂଗ୍ରେସ ବିଧାୟକ ଦଳ ନେତା ଯାହା କହିବେ ଆମେ କହିବାକୁ ଓ କରିବାକୁ ବାଧ୍ୟ । କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ରଙ୍କ ନିଷ୍ପତ୍ତିରେ ମୁଁ ସନ୍ତୁଷ୍ଟ ନୁହେଁ । ମୁଁ ତ ସନ୍ତୁଷ୍ଟ ନୁହେଁ, କିନ୍ତୁ ତାଙ୍କ ନିଷ୍ପତ୍ତି ଆମେ ମାନିବାକୁ ବାଧ୍ୟ । ପରୀ ହତ୍ୟା ମାମଲାର ସିବିଆଇ ତଦନ୍ତ ଓ ମନ୍ତ୍ରୀ ଅରୁଣ ସାହୁଙ୍କ ବହିଷ୍କାର ଦାବିରେ ବିଜେପି ବିଧାନସଭା ଚଳାଇ ଦେଲାନି । ସରକାର ଡରିକି ମାସକ ଆଗରୁ ବିଧାନସଭା ବନ୍ଦ କରିଦେଲେ । ପରୀ ପ୍ରସଙ୍ଗରେ ବିଜେପି ମାଇଲେଜ ନେଇଛି । ଆଗକୁ ବି ନେବ ବୋଲି ସନ୍ତୋଷ ସିଂ ସାଲୁଜା କହିିଥିଲେ । ପରେ ବିସ୍ଫୋରକ ବୟାନ ଦେଇ ସୁର ରାଉତରାୟ କହିଥିଲେ ଯେ, ଆମେ ବିଧାନସଭାରେ ଜୋରଦାର ହଙ୍ଗାମା କରିଥିଲୁ । ଏହା ପରେ ମୁଖ୍ୟମନ୍ତ୍ରୀ ଏସଆଇଟି ଗଠନ ହେବା କଥା କହିଲେ । ନରସିଂହ ମିଶ୍ର କହିଲେ ମୁଖ୍ୟମନ୍ତ୍ରୀ ଆମ କଥା ରଖିଲେ, ଆମେ ଓହରିଯିବା । ନରସିଂହ ମିଶ୍ର ଆମ ନେତା, ସେ କହିବାରୁ ଆମେ ଓହରିଗଲୁ । ପିସିସି ସଭାପତି ନିରଞ୍ଜନ ପଟ୍ଟନାୟକ କହିଥିଲେ ପ୍ରତି ଜିଲ୍ଲାରେ ଆନେ୍ଦାଳନ କରିବାକୁ । ନରସିଂହ-ନିରଞ୍ଜନ କଥାହେଲେ, ଆମକୁ ଓହରିଯିବାକୁ କହିଲେ । କିନ୍ତୁ ଏସଆଇଟି ତଦନ୍ତରେ ମୁଁ ଖୁସି ନୁହେଁ ବୋଲି ସୁର ରାଉତରାୟ କହିଥିଲେ । ଅନ୍ୟପକ୍ଷରେ ଓହରିଯିବାରେ କିଛି ମ୍ୟାନେଜ ହୋଇଛି ବୋଲି ପ୍ରଶ୍ନର ଉତ୍ତରରେ ‘ମ୍ୟାନେଜ ହୋଇଛି ବୋଲି ତ ଓହରିଲୁ’ ସୁର ରାଉତରାୟ କହିଥିଲେ । ତେବେ ସୁର ରାଉତରାୟଙ୍କ ମ୍ୟାନେଜ ମନ୍ତବ୍ୟରେ ସାଲୁଜା ଗୁରୁତ୍ୱପୂର୍ଣ୍ଣ ପ୍ରତିକ୍ରିୟା ରଖି କହିଛନ୍ତି ଯେ, ସୁର ଭାଇ ଯଦି ଏମିତି କହିଥିବେ, ତାହା ଗୁରୁତ୍ୱପୂର୍ଣ୍ଣ କଥା । ଯଦି ଏଭଳି ହୋଇଛି ତେବେ ନିଶ୍ଚିତଭାବେ ହାଇକମାଣ୍ଡ ପାଖକୁ ଯିବୁ ବୋଲି ସନ୍ତୋଷ ସିଂ ସାଲୁଜା କହିଛନ୍ତି ।