ବିପଦ ସମୟରେ ସାଥୀ ହୋଇଛି ରୋବଟ୍
ବିପଦ ସମୟରେ ସାଥୀ ହୋଇଛି ରୋବଟ୍
admin
1852
କିଛି ବର୍ଷ ତଳେ ବିଜ୍ଞବ୍ୟକ୍ତିଙ୍କ ମତ ଥିଲା, ରୋବଟ୍ ଅଧିକ ପରିମାଣରେ ଉତ୍ପାଦନ କରାଗଲେ ଆଗାମୀ ଦିନରେ ଏହା କାରଣରୁ ଯୁବପିଢ଼ି ଚାକିରି ହରାଇ ବସିବେ । ଯଦିଓ ସେ କଥାର ସତ୍ୟତା ପ୍ରମାଣିତ ହୋଇନାହିଁ, କିନ୍ତୁ ବର୍ତ୍ତମାନ ଦୁଃସ୍ଥିତିରେ ରୋବଟ ହିଁ ମନୁଷ୍ୟର ପ୍ରକୃତ ସାଥୀ ପାଲଟିଛି । ବିଶ୍ୱର ପ୍ରମୁଖ ପ୍ରାନ୍ତ ଲକଡାଉନ ହୋଇ ରହିଥିବା ବେଳେ ଆମେରିକା, ସ୍ପେନ, ଇଟାଲୀ, ଚୀନରେ ଲୋକଙ୍କୁ ରୋବଟ ହିଁ ସାହାଯ୍ୟ ଯୋଗାଉଥିବାର ପ୍ରକାଶ ।
କରୋନା ରୋବଟ: ଡାକ୍ତରଙ୍କ ସାହାଯ୍ୟ ନ ନେଇ ଏଇ ରୋବଟ ରୋଗୀ କରୋନା ଆକ୍ରାନ୍ତ କିମ୍ବା ନୁହେଁ, ତାହା ସ୍ପଷ୍ଟ କରିଥାଏ । ଅଲଟ୍ରାସାଉଣ୍ଡ, ଲାଳ ପରୀକ୍ଷା, ଶରୀରର ତାପମାତ୍ରା ଯାଞ୍ଚ ସହ ରୋଗୀର ଖାଦ୍ୟ ତାଲିକା ମଧ୍ୟ ପ୍ରସ୍ତୁତ କରେ ରୋବଟ । ଅନ୍ୟ ପାଖେ ନର୍ସ ରୋଗୀର କକ୍ଷକୁ ନ ଆସି ମଧ୍ୟ ରୋବଟରେ ଖଞ୍ଜା ହୋଇଥିବା କ୍ୟାମେରା ଜରିଆରେ ସବୁ କିଛି ତଦାରଖ କରିପାରନ୍ତି । ରୋଗୀଙ୍କ ଚିକିତ୍ସା ପରେ ରୋବଟଟି ନିଜକୁ ସାନିଟାଇଜ ମଧ୍ୟ କରେ । କରୋନା ରୋବଟ ଏବେ ଇଟାଲୀ, ସ୍ପେନ ଓ ବ୍ୟାଙ୍କକରେ କାର୍ଯ୍ୟକାରୀ ହୋଇଥିବାର ଜଣାପଡ଼ିଛି ।
ଡେଲିଭରୀ ରୋବଟ: ସାମାଜିକ ଦୂରତା ହିଁ ଏଇ ରୋଗରୁ ମୁକୁଳିବାର ମୁଖ୍ୟ ଉପାୟ ବୋଲି ବିଶେଷଜ୍ଞଙ୍କ ମତ । ଏଣୁ ଆମେରିକାରେ ଲକଡାଉନ ନିୟମକୁ କଡ଼ାକଡ଼ି ଭାବେ ପାଳନ କରାଯାଉଛି । ହୋମ ଡେଲିଭେରୀ ବ୍ୟବସ୍ଥା ପ୍ରତ୍ୟେକ ପ୍ରାନ୍ତରେ ଉପଲବ୍ଧ । ଏପରି ସ୍ଥଳେ ସେଠାକାର କେତେକ ନାମୀ କମ୍ପାନୀ ଡେଲିଭରୀ ରୋବଟ ସହାୟତାରେ ଗ୍ରାହକଙ୍କୁ ସାମଗ୍ରୀ ଯୋଗାଉଛି । ବୟସ୍କ ପିଢ଼ିଙ୍କୁ ଖାଦ୍ୟପାନୀୟ, ଔଷଧ, ସଉଦା, ପନିପରିବା ଯଥା ସମୟରେ ଏଇ ଡେଲିଭରୀ ରୋବଟ ପହଞ୍ଚାଇଥାନ୍ତି । ଲସଆଞ୍ଜେଲସ ଓ ନ୍ୟୁୟର୍କରେ ଏହି ସୁବିଧା ଉପଲବ୍ଧ ।
ୟୁଭିଡି ରୋବଟ୍: ନିଜ ଚାରିପାଖ ଅଞ୍ଚଳକୁ ସାନିଟାଇଜ କରିବା ବର୍ତ୍ତମାନ ସମୟରେ ଜରୁରୀ । ଚିକିତ୍ସାଳୟ ଗୁଡ଼ିକ ଏଇ ପରିସ୍ଥିତିରେ ରୀତିମତ ପରିଷ୍କାର କରାଯାଉଛି । ଚୀନ ଚିକିତ୍ସାଳୟ ଏଇ ୟୁଭିଡି ରୋବଟ ନିଜ ଅତିବାଇଗଣି ରଶ୍ମୀ ସହାୟତାରେ ସାନିଟାଇଜ କରୁଥିବାର ପ୍ରକାଶ ।
