ପୁଣି ମେଡିକାଲରେ ବିଜୟ ମହାନ୍ତି
ପୁଣି ମେଡିକାଲରେ ବିଜୟ ମହାନ୍ତି
admin
6374
ଭୁବନେଶ୍ୱର: ଅଭିନେତା ବିଜୟ ମହାନ୍ତି ଦୀର୍ଘଦିନ ହେଲା କେୟାର ହସ୍ପିଟାଲରେ ଚିକିତ୍ସିତ ହେଉଥିବା ବେଳେ ସ୍ୱାସ୍ଥ୍ୟାବସ୍ଥାରେ ବେଶ୍ କିଛି ସୁଧାର ଆସିନାହିଁ । ତେବେ କିିଛି ଦିନ ତଳେ ନିଜ ଘରକୁ ଫେରିବାକୁ ସେ ଇଚ୍ଛା କରିଥିଲେ । ତେଣୁ ପୂରା ଚିକିତ୍ସା ବ୍ୟବସ୍ଥା ସହ ତାଙ୍କୁ ରସୁଲଗଡ଼ ଶିଳ୍ପାଞ୍ଚଳସ୍ଥିତ ତାଙ୍କ ଆପାର୍ଟମେଣ୍ଟକୁ ଅଣାଯାଇଥିଲା । ଦୁଇଜଣ ସେବିକାଙ୍କୁ ନିୟୋଜିତ କରାଯାଇଥିଲା । ଦୁଇ ଦିନ ରହିବା ପରେ ପୁଣି ସ୍ୱାସ୍ଥ୍ୟବସ୍ଥା ବିଗିଡ଼ି ଯିବାରୁ ତାଙ୍କୁ ବୁଧବାର ସକାଳେ ମେଡିକାଲରେ ଭର୍ତ୍ତି କରାଯାଇଛି ।
ମିଳିଥିବା ସୂଚନା ମୁତାବକ, ବିଜୟ ଘରକୁ ଆସିଥିବା ଜାଣି ତାଙ୍କୁ ଭେଟିବା ପାଇଁ ମଙ୍ଗଳବାର ନାଟ୍ୟ ନିଦେ୍ର୍ଧଶକ ମନୋଜ ପଟ୍ଟନାୟକ ଓ ସୁବୋଧ ପଟ୍ଟନାୟକ ସାକ୍ଷାତ ପାଇଁ ଯାଇଥିଲେ । ଯିବା ପରେ ମନୋଜଙ୍କୁ ଦେଖି ବିଜୟ ସେବିକାଙ୍କ ଉଦେ୍ଧଶ୍ୟରେ କହିଥିଲେ, ଇଏ ମୋର ବୁଢ଼ା ଛାତ୍ର । ଏଥିସହ ‘ଘଡ଼ି ଘଡ଼ିକେ ଘୋଡ଼ା ଛୁଟୁଛି’ ନାଟକ କଥା ମନେ ପକାଇ ମନୋଜ ପଟ୍ଟନାୟକ ସେଥିରେ ମୁଖ୍ୟ ଭୂମିକାରେ ଅଭିନୟ କରିଥିଲା ଓକିଲ ଚରିତ୍ରର ଖୁବ୍ ପ୍ରଶଂସା କରିଥିଲେ । ଏକାଠି ପୁରୀ ଯିବା କଥା ମଧ୍ୟ ସେ ମନୋଜଙ୍କୁ ମନେ ପକାଇ ଦେଇଥିଲେ । ଏକଥା ବି କହିଥିଲେ, ମୁଁ ଭଲ ହୋଇଗଲା ପରେ ଆମେ ପୁଣି ନାଟକ ଆରମ୍ଭ କରିବା । ବିଶିଷ୍ଟ ନାଟ୍ୟ ବ୍ୟକ୍ତିତ୍ୱ ରତନ ଥିୟାମଙ୍କ କଥା ମନୋଜ ଶୁଣାଇବା ପରେ ତାଙ୍କ ସ୍ୱାସ୍ଥ୍ୟାବସ୍ଥା କଥା ମଧ୍ୟ ବିଜୟ ପଚାରି ବୁଝିଥିଲେ । ନାଟ୍ୟ ନିଦେ୍ର୍ଧଶକ ସୁବୋଧ ପଟ୍ଟନାୟକଙ୍କ ଦ୍ୱାରା ସୃଷ୍ଟି “ନାଟ୍ୟଗ୍ରାମ” ବାବଦରେ କଥା ହୋଇଥିଲେ । ତେବେ କଥାବାର୍ତ୍ତା ଚାଲୁ ନ ରଖିଲେ ପୁଣି ସବୁ ଭୁଲି ଯାଉଥିଲେ । ବିଜୟ କେୟାର ହସ୍ପିଟାଲରେ ଚିକିତ୍ସିତ ହେଉଥିବା ବେଳେ ପତ୍ନୀ ତଥା ଅଭିନେତ୍ରୀ ତନ୍ଦ୍ରା ଓ ଝିଅ, ଜ୍ୱାଇଁ ପାଖରେ ରହୁଛନ୍ତି । ସ୍ୱାସ୍ଥ୍ୟାବସ୍ଥାରେ ସୁଧାର ଆସିଲା ପରେ ଏକ ଅପରେସନ କରାଯିବ ବୋଲି ଡାକ୍ତର କହୁଥିବା ସୂଚନା ମିଳିଛି ।
