ପିଲାଙ୍କୁ ଦିଆଯିବ ୯୦ ଦିନର ମଧ୍ୟାହ୍ନଭୋଜନର ରୋଷେଇ ଖର୍ଚ୍ଚ
ପିଲାଙ୍କୁ ଦିଆଯିବ ୯୦ ଦିନର ମଧ୍ୟାହ୍ନଭୋଜନର ରୋଷେଇ ଖର୍ଚ୍ଚ
admin
2124
ଭୁବନେଶ୍ୱର: କୋଭିଡ-୧୯ ଲକଡାଉନ ଓ ଗ୍ରୀଷ୍ମ ଛୁଟି ଯୋଗୁଁ ସରକାରୀ ବିଦ୍ୟାଳୟ ଗୁଡ଼ିକ ବନ୍ଦ ରହିଛି । ଏହି ସମୟ (ଗତ ମାର୍ଚ୍ଚ ୧୬ ରୁ ଜୁନ ୧୩ ପର୍ଯ୍ୟନ୍ତ)ରେ ଛାତ୍ରଛାତ୍ରୀଙ୍କ ମଧ୍ୟାହ୍ନଭୋଜନ ଦିଆଯାଇପାରିନାହିଁ । ତେଣୁ ଏ ବାବଦରେ ଛାତ୍ରଛାତ୍ରୀଙ୍କ ପିଡିଏସ ରିଟେଲରମାନଙ୍କ ଦ୍ୱାରା ରାସନ ସାମଗ୍ରୀ ଯୋଗାଇ ଦିଆଯାଇଛି । ତେବେ ୨୦୧୫ ର ମଧ୍ୟାହ୍ନଭୋଜନ ଆଇନ ଅନୁଯାୟୀ ଯଦି କୌଣସି କାରଣ ଲାଗି ବିଦ୍ୟାଳୟରେ ମଧ୍ୟାହ୍ନଭୋଜନ ଦିଆଯାଇନଥାଏ ଦେବେ ସେ ବାବଦରେ ରୋଷେଇ ଖର୍ଚ୍ଚ ପିଲାଙ୍କୁ ଦିଆଯିବ । ସେହି ଅନୁଯାୟୀ ମାର୍ଚ୍ଚ ୧୬ ରୁ ଜୁନ ୧୩ ପର୍ଯ୍ୟନ୍ତ ୯୦ ଦିନର ମଧ୍ୟାହ୍ନଭୋଜନ ରୋଷେଇ ଅର୍ଥ ପିଲା/ ଅଭିଭାବକଙ୍କ ବ୍ୟାଙ୍କ ଖାତାରେ ଜମା କରିବା ପାଇଁ ମଧ୍ୟାହ୍ନଭୋଜନ ଅଭିଯାନର ରାଜ୍ୟ ନୋଡାଲ ଅଫିସର ଗଙ୍ଗାଧର ସାହୁ ବୁଧବାର ସବୁ ଜିଲ୍ଲାପାଳଙ୍କୁ ଚିଠି ଲେଖି ଜଣାଇଛନ୍ତି ।
୯୦ ଦିନ ପାଇଁ ପ୍ରାଥମିକ ଶ୍ରେଣୀ ଛାତ୍ରଛାତ୍ରୀଙ୍କ ଖାତାକୁ ୪୭୯.୯୬ ଟଙ୍କା ଓ ଉଚ୍ଚ ପ୍ରାଥମିକ ଶ୍ରେଣୀ ଛାତ୍ରଛାତ୍ରୀଙ୍କ ଖାତାକୁ ୭୧୭.୧୬ ଟଙ୍କା ପଠାଯିବ । ମାର୍ଚ୍ଚ ୧୬ ରୁ ୩୧ ପର୍ଯ୍ୟନ୍ତ ପ୍ରାଥମିକ ବିଦ୍ୟାଳୟ ପିଲାଙ୍କ ପିଛା ଦୈନିକ ୪ ଟଙ୍କା ଲେଖାଏ ଓ ଏପ୍ରିଲ ୧ ରୁ ଜୁନ ୧୩ ପର୍ଯ୍ୟନ୍ତ ୫ ଟଙ୍କା ୪୨ ପଇସା ଜମା ହେବ । ସେହିପରି ଉଚ୍ଚ ପ୍ରାଥମିକ ବିଦ୍ୟାଳୟର ଛାତ୍ରଛାତ୍ରୀଙ୍କ ଲାଗି ମାର୍ଚ୍ଚ ୧୬ ରୁ ୩୧ ପର୍ଯ୍ୟନ୍ତ ୭ ଟଙ୍କା ୩୬ ପଇସା ଏବଂ ଉଚ୍ଚ ପ୍ରାଥମିକ ବିଦ୍ୟାଳୟ ଲାଗି ୮ ଟଙ୍କା ୧୦ ପଇସା ଲେଖାଏଁ ପୈଠ ହେବ । ବ୍ଲକ ଶିକ୍ଷା ଅଧିକାରୀମାନେ ସ୍କୁଲ ତାଲିକା, ଅଭିଭାବକଙ୍କ ବ୍ୟାଙ୍କ ଆକାଉଣ୍ଟ ତାଲିକା ପ୍ରସ୍ତୁତ କରିବେ । କିନ୍ତୁ ଶିକ୍ଷାଅଧିକାରୀମାନେ ସ୍କୁଲ ଆକାଉଣ୍ଟକୁ ରୋଷେଇ ବାବଦ ଖର୍ଚ୍ଚ ତୁରନ୍ତ ପଠାଇବେ । ଯେଉଁ ଅଭିଭାବକଙ୍କର ବ୍ୟାଙ୍କ ଆକାଉଣ୍ଟ ନଥିବ ସେମାନଙ୍କୁ ସ୍କୁଲରେ ଧାର୍ଯ୍ୟ ରାଶି ପ୍ରଦାନ କରାଯିବ । ବଣ୍ଟନ ସମୟରେ ସାମାଜିକ ଦୂରତା ରଖିବା ସହ ମାସ୍କ ପିନ୍ଧିବାକୁ ବାଧ୍ୟତାମୂଳକ କରାଯିବ । ଏହି ସମୟରେ କରୋନା ଗାଇଡଲାଇନକୁ କଡ଼ାକଡ଼ି ପାଳନ କରିବାକୁ ନିର୍ଦ୍ଦେଶ ଦିଆଯାଇଛି ।
