କେନ୍ଦୁଝରରେ ଅଭାବନୀୟ ଘଟଣା, ପୁଅକୁ ଲଙ୍ଗଳା କରି ପିଠିରେ ଗଧ ଲେଖି ଘରୁ ବିଦା କଲେ ବାପା
କେନ୍ଦୁଝରରେ ଅଭାବନୀୟ ଘଟଣା, ପୁଅକୁ ଲଙ୍ଗଳା କରି ପିଠିରେ ଗଧ ଲେଖି ଘରୁ ବିଦା କଲେ ବାପା
admin
2336
ତେଲକୋଇ: ପାଠ ଭୁଲ୍ କରିବାରୁ ୭ ବର୍ଷର ପୁଅକୁ ନିସ୍ତୁକ ମାଡ଼ ମାରି ପିଠିରେ ଗଧ ଲେଖି ଘରୁ ବାହାର କରିଦେବା ଅଭିଯୋଗରେ ସଂପୃକ୍ତ ବାପାଙ୍କୁ ପୁଲିସ ଗିରଫ କରିଛି । ଏଭଳି ଅଭାବନୀୟ ଘଟଣା ଘଟିଛି କେନ୍ଦୁଝର ଜିଲ୍ଲା ତେଲକୋଇ ଅଞ୍ଚଳରେ । ଉଚ୍ଚଶିକ୍ଷିତ ପରିବାରରେ ଏଭଳି ଘଟଣା ଘଟିଥିବାରୁ ବିଭିନ୍ନ ମହଲରେ ଏହାକୁ ନାପସନ୍ଦ କରାଯାଇଛି । ବାପା ଅଶ୍ୱିନୀ ପାତ୍ର ଏକ ଜାତୀୟକରଣ ବ୍ୟାଙ୍କର ଅଧିକାରୀ ହୋଇଥିବା ବେଳେ ତାଙ୍କ ମା ଡା. ଦୀପ୍ତିମୟୀ ବଢ଼େଇ ହେଉଛନ୍ତି ଜଣେ ପ୍ରାଣୀ ଚିକିତ୍ସା ଅଧିକାରୀ । ଅଶ୍ୱିନୀ ଓ ଦୀପ୍ତିମୟୀଙ୍କ ଏକମାତ୍ର ପୁଅ ଦନ୍ଦୁଆମୁଣ୍ଡା ବନଫୁଲ ଇଂରାଜୀ ମାଧ୍ୟମ ସ୍କୁଲର ପ୍ରଥମ ଶ୍ରେଣୀର ଛାତ୍ର । ପୁଅ ପାଠ ଭୁଲ କରିବାରୁ ବାପା ଅଶ୍ୱିନୀ ତାଙ୍କୁ ଗତକାଲିଠାରୁ ମାଡ଼ ମାରୁଥିଲେ । ମଙ୍ଗଳବାର ପୂର୍ବାହ୍ନରେ ଅଶ୍ୱିନୀ ପୁଅକୁ ପୁଣି ମାଡ଼ ମାରିଥିଲେ । କେବଳ ସେତିକି ନୁହେଁ – \"ତା ଦ୍ୱାରା ପାଠ ହେବନାହିଁ, ଲଙ୍ଗଳା ହୋଇ ଭିକ ମାଗିବୁ ଯା\' କହି ଘରୁ ବାହାର କରିଦେଇଥିଲେ । ପିଲାଟି ଲଙ୍ଗଳା ହୋଇ ଭୟରେ କାନ୍ଦି କାନ୍ଦି ତେଲକୋଇ ବଜାର ଆଡ଼କୁ ଦୌଡ଼ୁଥିବା ବେଳେ ବାଳିକା ଉଚ୍ଚ ବିଦ୍ୟାଳୟ ନିକଟରେ ସ୍ଥାନୀୟ କେତେକ ଲୋକ ତାକୁ ଧରି ପୁଲିସକୁ ଖବର ଦେଇଥିଲେ । ପିଲାଟିର ଶରୀରର ବିଭିନ୍ନ ସ୍ଥାନରେ କ୍ଷତ ସୃଷ୍ଟି ହେବାସହ ବାମହାତ ପାପୁଲିରେ ଶକ୍ତ ଆଘାତ ଲାଗିଛି । ପୁଲିସ ଘଟଣାସ୍ଥଳରେ ପହଞ୍ଚି ତାକୁ ଉଦ୍ଧାର କରିବା ସହ ଶିଶୁ ସୁରକ୍ଷା ଆଇନ-୭୫ରେ ଏକ ମାମଲା ନିଜ ଆଡ଼ୁ ରୁଜୁ କରି ଅଭିଯୁକ୍ତ ବାପା ଅଶ୍ୱିନୀଙ୍କୁ ଗିରଫ କରିଛି ।
ଏନେଇ ଅଶ୍ୱିନୀଙ୍କୁ ପଚାରିବାରୁ, ପୁଅ ମିଛ କହିବା ସହ ପାଠ ଭୁଲ୍ କରିବାରୁ ତାକୁ ତାଗିଦ କରିଥିଲି । କିଛି ଲାକ ଅଯଥା ଝାମେଲା ସୃଷ୍ଟି କରୁଛନ୍ତି ବୋଲି କହିଛନ୍ତି । ମା’ଦୀପ୍ତିମୟୀଙ୍କୁ ପଚାରିବାରୁ, ଆମ ପରିବାର କଥା ଆମେ ବୁଝିବୁ । ଏଥିରେ କେହି ମୁଣ୍ଡ ପୁରାନ୍ତୁ ନାହିଁ ବୋଲି କହିଥିଲେ । ପିଲାଟିକୁ ମା\' ଦୀପ୍ତୀମୟୀଙ୍କୁ ହସ୍ତାନ୍ତର କରାଯାଇଛି ।
