ସୁବାସ ସିଂ କଟକ ମେୟର ପ୍ରାର୍ଥୀ!
ସୁବାସ ସିଂ କଟକ ମେୟର ପ୍ରାର୍ଥୀ!
admin
ଭୁବନେଶ୍ୱର : ପୌର ନିର୍ବାଚନ ପାଇଁ ବିଗୁଲ ବାଜିସାରିଛି । ଏବେ ନାମାଙ୍କନ ପତ୍ର ଦାଖଲ ପ୍ରକ୍ରିୟା ଚାଲିଥିବାବେଳେ ବିଜୁ ଜନତା ଦଳ ଓ ଭାରତୀୟ ଜନତା ପାର୍ଟି କଟକ ଓ ଭୁବନେଶ୍ୱର ମହାନଗର ନିଗମ ପାଇଁ ମେୟର ପ୍ରାର୍ଥୀ ଘୋଷଣା କରିନାହାନ୍ତି । ଚଳିତ ଥର ସିଧାସଳଖ ମେୟର ନିର୍ବାଚନ ହେଉଥିବାରୁ ଟାଣୁଆ ପ୍ରାର୍ଥୀ ଦେବାକୁ ମନସ୍ଥ କରିଛି ବିଜୁ ଜନତା ଦଳ ।
ଭୁବନେଶ୍ୱର ମେୟର ଆସନଟି ମହିଳାମାନଙ୍କ ପାଇଁ ସଂରକ୍ଷିତ ଥିବାବେଳେ କଟକ ମେୟର ଆସନଟି ସାଧାରଣ ବର୍ଗ ରହିଛି । ଏହି ପରିପ୍ରେକ୍ଷୀରେ କଟକରୁ ରାଜ୍ୟସଭା ସାଂସଦ ସୁବାସ ସିଂଙ୍କୁ ମେୟର ପ୍ରାର୍ଥୀ କରାଯାଇପାରେ ବୋଲି ବିଜେଡ଼ି ଅଳିନ୍ଦରେ ଚର୍ଚ୍ଚା ଜୋର ଧରିଛି । କଟକ ମେୟର ପ୍ରାର୍ଥୀ ପାଇଁ ପୂର୍ବରୁ ପ୍ରଭାତ ତ୍ରିପାଠୀ ଓ ପ୍ରଭାତ ବିଶ୍ୱାଳଙ୍କ ସହ ବି କେତେକ ନେତା ଆଲୋଚନା କରିଥିଲେ । କିନ୍ତୁ ସେମାନେ ରାଜି ହୋଇନଥିଲେ । ଏହି ପରିପ୍ରେକ୍ଷୀରେ ସୁବାସଙ୍କ ଉପରେ ନଜର ରହିଛି । କଟକର ଜଣେ ଟାଣୁଆ ନେତା ଭାବେ ସୁବାସ ସିଂଙ୍କର ସୁନାମ ରହିଛି । ତେବେ ଗୁରୁତ୍ୱପୂର୍ଣ୍ଣ ଦିଗଟି ହେଉଛି, ସୁବାସ ସିଂ ଏବେ ରାଜ୍ୟସଭା ସାଂସଦ ଅଛନ୍ତି । ତାଙ୍କର କାର୍ଯ୍ୟକାଳ ଆହୁରି ୪ ବର୍ଷ ରହିଛି । ତେବେ ସୁବାସଙ୍କୁ ପ୍ରାର୍ଥୀ କରି ଦଳ ଗୋଟିଏ ଗୁଳିରେ ଦୁଇଟି ଶିକାର କରିବାକୁ ଚାହୁଁଥିବା ଜଣାପଡ଼ିଛି । ସୁବାସ ମେୟର ହେଲେ ରାଜ୍ୟସଭା ଆସନ ଫାଙ୍କା ପଡ଼ିବ । ଏହି ଆସନରେ ଆଉ ଜଣେ ନେତା ରାଜ୍ୟସଭାକୁ ଯାଇପାରିବେ । ଖୁବଶୀଘ୍ର ଏହି ଚର୍ଚ୍ଚା ଉପରେ ଯବନିକା ପଡ଼ିବ ବୋଲି ଆଶା କରାଯାଉଛି ।
ସୁବାସ ସିଂ କଟକରୁ ମେୟର ପ୍ରାର୍ଥୀ ହେବେକି ନାହିଁ ତାହା ସ୍ପଷ୍ଟ ହୋଇନଥିଲେବି ଆଜି ତାଙ୍କ ପୁଅ ସୁବାସ ସିଂଙ୍କ ଫେସବୁକ ପେଜକୁ ପ୍ରମୋସନ କରିଛନ୍ତି । ତେଣୁ ସେ ହିଁ ପ୍ରାର୍ଥୀ ହେବେବୋଲି ଚର୍ଚ୍ଚା ଦୃଢ଼ୀଭୂତ ହୋଇଛି ।
