ପ୍ରତାପ ଷଡଙ୍ଗୀଙ୍କୁ ମିଳିନି ସରକାରୀ ଘର

Jul 3, 2019 - 05:15 Updated: Jul 3, 2019 - 05:15

5082

ନୂଆଦିଲ୍ଲୀ : ମୋଦି ସରକାରଙ୍କ ମନ୍ତ୍ରୀ ମଣ୍ଡଳରେ ପ୍ରଥମ ଥର ପାଇଁ ସ୍ଥାନ ପାଇଥିବା ବିଜେପିର ବାଲେଶ୍ୱର ସାଂସଦ ତଥା କେନ୍ଦ୍ର ରାଷ୍ଟ୍ରମନ୍ତ୍ରୀ ପ୍ରତାପ ଷଡଙ୍ଗୀଙ୍କୁ ବର୍ତ୍ତମାନ ସୁଦ୍ଧା ସରକାରୀ ଆବାସ ସହ କାର୍ଯ୍ୟାଳୟ ପ୍ରକୋଷ୍ଠ ମିଳିପାରି ନାହିଁ । ଏହା ଦ୍ୱାରା ମନ୍ତ୍ରୀ ପ୍ରତାପ ଷଡଙ୍ଗୀ ଓଡ଼ିଶା ଭବନରେ ସରକାରୀ କାର୍ଯ୍ୟ କରୁଛନ୍ତି । କେନ୍ଦ୍ର ରାଷ୍ଟ୍ରମନ୍ତ୍ରୀ ପ୍ରତାପ ଷଡଙ୍ଗୀଙ୍କୁ ଦୁଇଟି ମନ୍ତ୍ରାଳୟ କ୍ଷୁଦ୍ର, ଲଘୁ ଓ ମଧ୍ୟମ ଉଦ୍ୟୋଗ ଏବଂ ଦୁଗ୍ଧ ଉତ୍ପାଦନ, ପଶୁପାଳନ ଓ ମତ୍ସ୍ୟପାଳନ ମନ୍ତ୍ରାଳୟର ରାଷ୍ଟ୍ରମନ୍ତ୍ରୀ ଭାବେ ଦାୟିତ୍ୱ ମିଳିଛି । ଦାୟିତ୍ୱ ନେବାର ଗୋଟିଏ ମାସ ବିତି ଯାଇଛି । କୃଷି ଭବନରେ ଦୁଗ୍ଧ ଉତ୍ପାଦନ, ପଶୁପାଳନ ଓ ମତ୍ସ୍ୟ ପାଳନ ମନ୍ତ୍ରାଳୟ କାର୍ଯ୍ୟାଳୟ ଥିବା ବେଳେ ପ୍ରତାପଙ୍କୁ ରାଷ୍ଟ୍ରମନ୍ତ୍ରୀ ରୂପେ ସେଠାରେ କୌଣସି ପ୍ରକୋଷ୍ଠ ମିଳିପାରିନି । ଉଦ୍ୟୋଗ ଭବନରେ କ୍ଷୁଦ୍ର, ଲଘୁ, ଓ ମଧ୍ୟମ ଉଦ୍ୟୋଗ ମନ୍ତ୍ରାଳୟରେ ତାଙ୍କୁ ଆବଣ୍ଟନ କରାଯାଇଥିବା ପ୍ରକୋଷ୍ଠ ମନ୍ତ୍ରାଳୟ ଦ୍ୱାରା ଆବଣ୍ଟନ କରାଯାଇଛି । କିନ୍ତୁ ପ୍ରକୋଷ୍ଠ ଖାଲି ହୋଇ ନାହିଁ । ଅପରପକ୍ଷେ ଦିଲ୍ଲୀ ବିଜେପି କାର୍ଯ୍ୟାଳୟ ନିକଟରେ ଥିବା ୧୦ ପଣ୍ଡିତ ପନ୍ଥ ମାର୍ଗ ସ୍ଥିତ ଟାଇପ-୭ ବଙ୍ଗଳା ଆବଣ୍ଟନ କରାଯାଇଥିବା ବେଳେ ବର୍ତ୍ତମାନ ସୁଦ୍ଧା ଏହା ଖାଲି ହୋଇନଥିବାରୁ ମନ୍ତ୍ରୀ ଷଡଙ୍ଗୀଙ୍କୁ କିଛି ସମୟ ଅପେକ୍ଷା କରିବାକୁ ପଡ଼ିବ ବୋଲି କୁହାଯାଉଛି ।