ଇକୋ ରିଟ୍ରିଟରେ ରହିଛି ଓଡିଶା ପର୍ଯ୍ୟଟନର ବିବିଧତା : ନବୀନ ପଟ୍ଟନାୟକ
ଇକୋ ରିଟ୍ରିଟରେ ରହିଛି ଓଡିଶା ପର୍ଯ୍ୟଟନର ବିବିଧତା : ନବୀନ ପଟ୍ଟନାୟକ
admin
6725
ଭୁବନେଶ୍ୱର : ପୁରୀ-କୋଣାର୍କ ମେରାଇନ ଡ୍ରାଇଭରେ ଅନୁଷ୍ଠିତ ଇକୋ ରିଟ୍ରିଟକୁ ଏକ ବର୍ଷ ପୁରିଛି । ଏହି ଅବସରରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଇକୋ ରିଟ୍ରିଟର ନୂତନ ଲୋଗୋ ଉନ୍ମୋଚନ କରିଛନ୍ତି । ଏହା ସହିତ ୫ଟି ନୂତନ ଇକୋ ରିଟ୍ରିଟ ସ୍ଥାନ୍ ମଧ୍ୟ ଘୋଷଣା କରାଯାଇଛି । ଆସନ୍ତା ୩ ମାସ ଯାଏଁ ଏହି ବିଳାସପୂର୍ଣ୍ଣ ଇକୋ ରିଟ୍ରିଟ ଜାରି ରହିବ । ଆଜିଠାରୁ ଏହି ଇକୋ ରିଟ୍ରିଟ ବୁକିଂ ଆରମ୍ଭ ସମ୍ପର୍କରେ ମୁଖ୍ୟମନ୍ତ୍ରୀ ଘୋଷଣା କରିଛନ୍ତି ।
ଇକୋ ରିଟ୍ରିଟର ଦ୍ୱିତୀୟ ବର୍ଷରେ ୫ଟି ନୂତନ ସ୍ଥାନ ସାମିଲ କରାଯାଇଛି । ଏହି ୫ଟି ସ୍ଥାନ ହେଉଛି କୋଣାର୍କ, ହୀରାକୁଦ, ଭିତରକନିକା, ଦାରିଙ୍ଗିବାଡି ଏବଂ ସାତକୋଶିଆ । ଏହି ଇକୋ ରିଟ୍ରିଟ ଗୁଡିକ ପର୍ଯ୍ୟଟନର ଅନନ୍ୟ ଅନୁଭୂତି ପ୍ରଦାନ କରିବ । ଇକୋ ରିଟ୍ରିଟରେ ପର୍ଯ୍ୟଟକ ମାନେ ଓଡିଶା ପର୍ଯ୍ୟଟନର ବିବିଧତା ଅନୁଭବ କରି ପାରିବେ ବୋଲି ମୁଖ୍ୟମନ୍ତ୍ରୀ ପ୍ରକାଶ କରିଥିଲେ । ପ୍ରତି ଜିଲ୍ଳା ପ୍ରଶାସନଙ୍କ ସହାୟତାରେ ଏହି କାର୍ଯ୍ୟକ୍ରମ ସଫଳ ହେବ ବୋଲି ନବୀନ ଆଶା ପ୍ରକାଶ କରିଛନ୍ତି ।
କରୋନା ଦ୍ୱାରା ପ୍ରଭାବିତ ହୋଇଥିବା ରାଜ୍ୟର ଅର୍ଥନୀତି ଏହା ଦ୍ୱାରା ସଠିକ ଦିଶାକୁ ଆସିବ ବୋଲି ନବୀନ କହିଥିଲେ । ଇକୋ ରିଟ୍ରିଟର ସଫଳତା କାରଣରୁ ରାଜ୍ୟରେ ଜାନୁୟାରୀ ମାସରେ ପର୍ଯ୍ୟଟନ ମନ୍ତ୍ରୀଙ୍କ ସମାବେଶ ଅନୁଷ୍ଠିତ ହୋଇଥିଲା ବୋଲି ପର୍ଯ୍ୟଟନ ମନ୍ତ୍ରୀ ଜ୍ୟୋତି ପ୍ରକାଶ ପାଣିଗ୍ରାହୀ ପ୍ରକାଶ କରିଛନ୍ତି । ମୁଖ୍ୟମନ୍ତ୍ରୀଙ୍କ ସ୍ୱପ୍ନକୁ ପୂରଣ କରିବା ପାଇଁ ଏହା ଶ୍ରେଷ୍ଠ ସୁଯୋଗ ବୋଲି ଶ୍ରୀ ପାଣିଗ୍ରାହୀ ପ୍ରକାଶ କରିଛନ୍ତି । ଇକୋ ରିଟ୍ରିଟ ବୈଷୟିକ କୌଶଳ ଏବଂ ପରିବେଶ ସୁରକ୍ଷାର ଏକ ଭଲ ସମନ୍ୱୟ ବୋଲି ମୁଖ୍ୟ ଶାସନ ସଚିବ ଅସିତ କୁମାର ତ୍ରିପାଠୀ ମତ ଦେଇଥିଲେ । ଅନ୍ୟମାନଙ୍କ ମଧ୍ୟରେ ପର୍ଯ୍ୟଟନ ସଚିବ ବିଶାଲ ଦେବ, ଉନ୍ନୟନ କମିଶନର ଜଙ୍ଗଲ ଏବଂ ପରିବେଶ ମନ୍ତ୍ରାଳୟ, ଅର୍ଥ ସଚିବ, ୫ଟି ସଚିବ ଏବଂ ଓଟିଡିସି ମୁଖ୍ୟ ପ୍ରମୁଖ ଯୋଗ ଦେଇଥିଲେ ।
